ab us pe chaand sitaare bhi rashk karte hain — Adnan Mohsin

tere pahlu mein zaraa der ko sustaa lungaa
tujh tak aa pahunchaa agar niind mein chaltaa huaa main

ghurur-e-tishna-dahaani tiri baqaa ki qasam
nadi hamaare labon ki taraf uchhalti rahi

magar main zaat ke sahraa mein mahv-e-raqs rahaa
mujhe bhi koh-e-nidaa ki taraf bulaayaa gayaa

pairon se Takraate hain jab jhonke sard havaaon ke
haath larazne lag jaate hain chamDe ke dastaanon mein

vo chaand hai to aks bhi paani mein aaegaa
kirdaar khud ubhar ke kahaani mein aaegaa

tiraa shabaab rahe ham rahein sharaab rahe
ye daur aish kaa taa daur-e-aaftaab rahe

sab hue mahv use dekh jidhar se niklaa
the taajjub mein ki ye chaand kidhar se niklaa

gahan se chaand nikaltaa hai kis tarah dekhein
naqaab ko rukh-e-raushan se khol-khaal ke pheink

garche tark-e-aashnaai ko zamaana ho gayaa
lekin ab tak chaunk uThte hain vo mere naam se

kisi ke haath mein jaam-e-sharaab aayaa hai
ki maahtaab tah-e-aaftaab aayaa hai