ghurur-e-tishna-dahaani tiri baqaa ki qasam — Adnan Mohsin

ab us pe chaand sitaare bhi rashk karte hain
vo ik diyaa jo kabhi dasht mein bujhaayaa gayaa

tere pahlu mein zaraa der ko sustaa lungaa
tujh tak aa pahunchaa agar niind mein chaltaa huaa main

magar main zaat ke sahraa mein mahv-e-raqs rahaa
mujhe bhi koh-e-nidaa ki taraf bulaayaa gayaa

pairon se Takraate hain jab jhonke sard havaaon ke
haath larazne lag jaate hain chamDe ke dastaanon mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge