tiraa shabaab rahe ham rahein sharaab rahe — Jaleel Manikpuri

aaj hai vo bahaar kaa mausam
phuul toDun to haath jaam aae

pyaari surat vo haae kyaa hogi
jis ko be-dekhe pyaar aataa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

mohabbat ek taraf se mazaa nahin deti
kuchh iztiraab tujhe ho kuchh iztiraab mujhe

jo tire ishq mein tabaah huaa
koi us ko tabaah kar na sakaa

vo chaand hai to aks bhi paani mein aaegaa
kirdaar khud ubhar ke kahaani mein aaegaa

muddaton baa'd kabhi ai nazar aane vaale
iid kaa chaand na dekhaa tiri surat dekhi

puchhaa jo un se chaand nikaltaa hai kis tarah
zulfon ko rukh pe Daal ke jhaTkaa diyaa ki yuun

usi ki shakl mujhe chaand mein nazar aae
vo maah-rukh jo lab-e-baam bhi nahin aataa

kisi ke haath mein jaam-e-sharaab aayaa hai
ki maahtaab tah-e-aaftaab aayaa hai

dharti aur ambar par donon kyaa raanaai baanT rahe the
phuul khilaa thaa tanhaa tanhaa chaand ugaa thaa tanhaa tanhaa