ajab Thahraao paidaa ho rahaa hai roz o shab mein — Ahmad Ashfaq

biktaa rahtaa sar-e-baazaar kai qiston mein
shukr hai mere khudaa ne mujhe shohrat nahin di

kisi ki shakhsiyat majruh kar di
zamaane bhar mein shohrat ho rahi hai

faasle ye simaT nahin sakte
ab paraayon mein kar shumaar mujhe

meri kam-goi pe jo tanz kiyaa karte hain
meri kam-goi ke asbaab se naa-vaaqif hain

lagtaa hai ki is dil mein koi qaid hai 'ashfaaq'
rone ki sadaa aati hai yaadon ke khanDar se

chikh uThtaa hai dafatan kirdaar
jab koi shakhs bad-gumaan ho jaae

shor din ko nahin sone detaa
shab ko sannaaTaa jagaa detaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ye bundein pahli baarish ki ye sondhi khushbu maaTi ki
ik koyal baagh mein kuuki hai aavaaz yahaan tak aai hai