maiñ aaj zad pe agar huuñ to ḳhush-gumān na ho — Ahmad Faraz

ranjish hī sahī dil hī dukhāne ke liye aa
aa phir se mujhe chhoḌ ke jaane ke liye aa

ab ke ham bichhḌe to shāyad kabhī ḳhvāboñ meñ mileñ
jis tarah sūkhe hue phuul kitāboñ meñ mileñ

kisī ko ghar se nikalte hī mil ga.ī manzil
koī hamārī tarah umr bhar safar meñ rahā

tum takalluf ko bhī iḳhlās samajhte ho 'farāz'
dost hotā nahīñ har haath milāne vaalā

ab to ye aarzū hai ki vo zaḳhm khā.iye
tā-zindagī ye dil na koī aarzū kare

jo zahr pī chukā huuñ tumhīñ ne mujhe diyā
ab tum to zindagī kī duā.eñ mujhe na do

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

vo to ḳhush-bū hai havāoñ meñ bikhar jā.egā
mas.ala phuul kā hai phuul kidhar jā.egā

jis khet se dahqāñ ko mayassar nahīñ rozī
us khet ke har ḳhosha-e-gandum ko jalā do

ab ḳhushī hai na koī dard rulāne vaalā
ham ne apnā liyā har rang zamāne vaalā

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ