sab pe khulne kī hameñ hī aarzū shāyad na thī — Shayari Of Ahmad Fareed

zindagī! tujh sā munāfiq bhī koī kyā hogā
terā shahkār huuñ aur terā hī maarā huā huuñ

zaḳhm gintā huuñ shab-e-hijr meñ aur sochtā huuñ
maiñ to apnā bhī na thā kaise tumhārā huā huuñ

sāmne phir mire apne haiñ so maiñ jāntā huuñ
jiit bhī jā.ūñ to ye jañg maiñ haarā huā huuñ

apnā saaya to maiñ dariyā meñ bahā aayā thā
kaun phir bhaag rahā hai mire pīchhe pīchhe

tamannā dard-e-dil kī ho to kar ḳhidmat faqīroñ kī
nahīñ miltā ye gauhar bādshāhoñ ke ḳhazīnoñ meñ

hakīm o aarif o suufī tamām mast-e-zahūr
kise ḳhabar ki tajallī hai ain-e-mastūrī

zamīr-e-lāla mai-e-lāl se huā labrez
ishāra paate hī suufī ne toḌ dī parhez

ḳhudāvandā ye tere sāda-dil bande kidhar jaa.eñ
ki darveshī bhī ayyārī hai sultānī bhī ayyārī

kise ḳhabar ki safīne Dubo chukī kitne
faqīh o suufī o shā.ir kī nā-ḳhush-andeshī

ye masā.il-e-tasavvuf ye tirā bayān 'ġhālib'
tujhe ham valī samajhte jo na bāda-ḳhvār hotā