chup kahin aur liye phirti thi baatein kahin aur — Ahmad Mushtaq

khoyaa hai kuchh zarur jo us ki talaash mein
har chiiz ko idhar se udhar kar rahe hain ham

dukh ke safar pe dil ko ravaana to kar diyaa
ab saari umr haath hilaate raheinge ham

koi tasvir mukammal nahin hone paati
dhuup dete hain to saayaa nahin rahne dete

mohabbat mar gai 'mushtaaq' lekin tum na maanoge
main ye afvaah bhi tum ko sunaa kar dekh letaa huun

tire aane kaa din hai tere raste mein bichhaane ko
chamakti dhuup mein saae ikaTThe kar rahaa huun main

paani mein aks aur kisi aasmaan kaa hai
ye naav kaun si hai ye dariyaa kahaan kaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

vo apni umr ko pahle piro letaa hai Dori mein
phir us ke baa'd ginti umr ki din raat kartaa hai

ab to aaraam karein sochti aankhein meri
raat kaa aakhiri taaraa bhi hai jaane vaalaa

kis ki khushbu ne bhar diyaa thaa use
us ke andar koi khalaa na rahaa