main kisi aur hi aalam kaa makin huun pyaare — Akbar Masoom

ab teraa khel khel rahaa huun main apne saath
khud ko pukaartaa huun aur aataa nahin huun main

rah jaaegi ye saari kahaani yahin dhari
ik roz jab main apne fasaane mein jaaungaa

jis ke baghair ji nahin sakte the jaa chukaa
par dil se dard aankh se aansu kahaan gayaa

ab tujhe meraa naam yaad nahin
jab ki teraa pataa rahaa huun main

hai musibat mein giraftaar musibat meri
jo bhi mushkil hai vo mere liye aasaani hai

vo aur honge jo kaar-e-havas pe zinda hain
main us ki dhuup se saaya badal ke aayaa huun

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

tujhe kuchh ishq o ulfat ke sivaa bhi yaad hai ai dil
sunaae jaa rahaa hai ek hi afsaana barson se

ishq hai be-gudaaz kyuun husn hai be-niyaaz kyuun
meri vafaa kahaan gai un ki jafaa ko kyaa huaa

kuchh badan ke the taqaaze kuchh sharaarat dil ki thi
aaj lekin ishq apnaa jaavedaan hone ko thaa

lutf-e-sohbat mataa-e-ulfat hai
kuchh kaho aur kuchh suno pyaare