fareb-e-jalva kahaan tak ba-ru-e-kaar rahe — Akhtar Ali Akhtar

chaTak mein ghunche ki vo saut-e-jaan-fazaa to nahin
suni hai pahle bhi aavaaz ye kahin main ne

mujhi ko parda-e-hasti mein de rahaa hai fareb
vo husn jis ko kiyaa jalva-aafrin main ne

tum ne har zarre mein barpaa kar diyaa tufaan-e-shauq
ik tabassum is qadar jalvon ki tughyaani ke saath

guftugu-e-surat-o-maani hai unvaan-e-hayaat
khelte hain vo miri fitrat ki hairaani ke saath

sab se baDaa fareb hai khud zindagi 'adaa'
is hila-ju ke saath hain ham bhi bahaana-saaz

kisi kaa yuun to huaa kaun umr bhar phir bhi
ye husn o ishq to dhokaa hai sab magar phir bhi

maujud mere dil mein jo zakhmon ke daagh hain
vo ek bevafaa ke sitam ke charaagh hain

baDe vasuq se duniyaa fareb deti rahi
baDe khulus se ham e'tibaar karte rahe

'aarif'-husain dhokaa sahi apni zindagi
is zindagi ke baa'd ki haalat bhi hai fareb

jin kaa maqsad fareb hotaa hai
vo baDi saadgi se milte hain