ye kis azaab mein us ne phansaa diyaa mujh ko — Ata Ul Haq Qasmi

dilon se khauf nikaltaa nahin azaabon kaa
zamin ne oDh liye sar par aasmaan phir se

lagtaa nahin ki us se maraasim bahaal hon
main kyaa karun ki thoDaa saa paagal to main bhi huun

use ab bhuul jaane kaa iraada kar liyaa hai
bharosa ghaaliban khud par ziyaada kar liyaa hai

jis ki khaatir main bhulaa baiThaa thaa apne aap ko
ab usi ke bhuul jaane kaa hunar bhi dekhnaa

vo ek shakhs ki manzil bhi raastaa bhi hai
vahi duaa bhi vahi haasil-e-duaa bhi hai

gum huaa jaataa hai koi manzilon ki gard mein
zindagi bhar ki masaafat raaegaan hone ko hai