suraj se us kaa naam-o-nasab puchhtaa thaa main — Bharat Bhushan Pant

sabab khaamoshiyon kaa main nahin thaa
mire ghar mein sabhi kam bolte the

ham saraabon mein hue daakhil to ye ham par khulaa
tishnagi sab mein thi lekin tishnagi mein kaun thaa

hamaari baat kisi ki samajh mein kyuun aati
khud apni baat ko kitnaa samajh rahe hain ham

main thoDi der bhi aankhon ko apni band kar luun to
andheron mein mujhe ik raushni mahsus hoti hai

hamaare haal pe ab chhoD de hamein duniyaa
ye baar baar hamein kyuun bataanaa paDtaa hai

ghar se nikal kar jaataa huun main roz kahaan
ik din apnaa pichhaa kar ke dekhaa jaae

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

main tamaam din kaa thakaa huaa tu tamaam shab kaa jagaa huaa
zaraa Thahar jaa isi moD par tere saath shaam guzaar luun

ajiib raat thi kal tum bhi aa ke lauT gae
jab aa gae the to pal bhar Thahar gae hote