hamaari baat kisi ki samajh mein kyuun aati — Bharat Bhushan Pant

sabab khaamoshiyon kaa main nahin thaa
mire ghar mein sabhi kam bolte the

ham saraabon mein hue daakhil to ye ham par khulaa
tishnagi sab mein thi lekin tishnagi mein kaun thaa

main thoDi der bhi aankhon ko apni band kar luun to
andheron mein mujhe ik raushni mahsus hoti hai

hamaare haal pe ab chhoD de hamein duniyaa
ye baar baar hamein kyuun bataanaa paDtaa hai

kahin jaise main koi chiiz rakh kar bhuul jaataa huun
pahan letaa huun jab dastaar to sar bhuul jaataa huun

ghar se nikal kar jaataa huun main roz kahaan
ik din apnaa pichhaa kar ke dekhaa jaae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aur bhi to hain zamaane mein tumhaare aashiq
ek main hi tumhein kyaa qaabil-e-ilzaam milaa