Shayari Of Bashir Badr

baḌe logoñ se milne meñ hamesha fāsla rakhnā
jahāñ dariyā samundar se milā dariyā nahīñ rahtā

sar jhukāoge to patthar devtā ho jā.egā
itnā mat chāho use vo bevafā ho jā.egā

zindagī tū ne mujhe qabr se kam dī hai zamīñ
paañv phailā.ūñ to dīvār meñ sar lagtā hai

dushmanī jam kar karo lekin ye gunjā.ish rahe
jab kabhī ham dost ho jaa.eñ to sharminda na hoñ

kuchh to majbūriyāñ rahī hoñgī
yuuñ koī bevafā nahīñ hotā

uḌne do parindoñ ko abhī shoḳh havā meñ
phir lauT ke bachpan ke zamāne nahīñ aate

musāfir haiñ ham bhī musāfir ho tum bhī
kisī moḌ par phir mulāqāt hogī

ujāle apnī yādoñ ke hamāre saath rahne do
na jaane kis galī meñ zindagī kī shaam ho jaa.e

ham bhī dariyā haiñ hameñ apnā hunar mālūm hai
jis taraf bhī chal paḌeñge rāsta ho jā.egā

mohabbatoñ meñ dikhāve kī dostī na milā
agar gale nahīñ miltā to haath bhī na milā

har dhaḌakte patthar ko log dil samajhte haiñ
umreñ biit jaatī haiñ dil ko dil banāne meñ

yahāñ libās kī qīmat hai aadmī kī nahīñ
mujhe gilās baḌe de sharāb kam kar de