sunaa hai har ghaDi tu muskuraataa rahtaa hai — Farooq Shafaq

zehn ki aavaargi ko bhi panaahein chaahiye
yuun na shamon ko kisi dahliz par rakh kar bujhaa

din kisi tarah se kaT jaaegaa saDkon pe 'shafaq'
shaam phir aaegi ham shaam se ghabraaeinge

aaj sochaa hai jaagungaa main raat mein
kachche phal saa mujhe toDtaa kaun hai

shahr mein jiinaa hai chalnaa do-rukhi talvaar par
aadmi kis se bache kis ki taraf-daari kare

apni laghzish ko to ilzaam na degaa koi
log thak-haar ke mujrim hamein Thahraaeinge

hone vaalaa thaa ik haadsa rah gayaa
kal kaa sab se baDaa vaaqia rah gayaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shor din ko nahin sone detaa
shab ko sannaaTaa jagaa detaa hai

meri nigaah-e-shauq bhi kuchh kam nahin magar
phir bhi tiraa shabaab tiraa hi shabaab hai