sukun-e-dil ke liye ishq to bahaana thaa — Fatima Hasan

raat dariche tak aa kar ruk jaati hai
band aankhon mein us kaa chehra rahtaa hai

ulajh ke rah gae chehre miri nigaahon mein
kuchh itni tezi se badle the un ki baat ke rang

dikhaai detaa hai jo kuchh kahin vo khvaab na ho
jo sun rahi huun vo dhokaa na ho samaaat kaa

bhuul gai huun kis se meraa naata thaa
aur ye naata kaise TuuTaa bhuul gai

main ne pahunchaayaa use jiit ke har khaane mein
meri baazi thi miri maat samajhtaa hi nahin

main ne maan kaa libaas jab pahnaa
mujh ko titli ne apne rang diye

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ahl-e-havas to khair havas mein hue zalil
vo bhi hue kharaab, mohabbat jinhon ne ki

ishq mein kaun bataa saktaa hai
kis ne kis se sach bolaa hai

is maarke mein ishq bechaaraa karegaa kyaa
khud husn ko hain jaan ke laale paDe hue

unhein bhi josh-e-ulfat ho to lutf uTThe mohabbat kaa
hamin din-raat agar taDpe to phir is mein mazaa kyaa hai