dil miraa shaaki-e-jafaa na huaa — Figar Unnavi

maayus dilon ko ab chheDo bhi to kyaa haasil
TuuTe hue paimaane fariyaad nahin karte

fazaa kaa tang honaa fitrat-e-aazaad se puchho
par-e-parvaaz hi kyaa jo qafas ko aashiyaan samjhe

dil hai miraa rangini-e-aaghaaz pe maail
nazron mein abhi jaam hai anjaam nahin hai

ik teraa aasraa hai faqat ai khayaal-e-dost
sab bujh gae charaagh shab-e-intizaar mein

un pe qurbaan har khushi kar di
zindagi nazr-e-zindagi kar di

partav-e-husn se zarre bhi bane aaine
kitne jalve kiye arzaan tiri raanaai ne

dhokaa hai numaaish hai tamaashaa hai guzar jaa
ye raunaq-e-baazaar ye duniyaa hai guzar jaa

ye kyaa zaruri ki sab baa-vafaa pukaarein hamein
koi to hai jo hamein bevafaa pukaartaa hai

vafaa kaa har chalan sikhlaa diyaa thaa
kisi ne bevafaa hone se pahle

bevafaa umr daghaabaaz javaani nikli
na yahi rahti hai zaalim na vahi rahti hai

har uzv hai dil-fareb teraa
kahiye kise kaun saa hai behtar

vafaa-shiaar kai hain koi hasin bhi to ho
chalo phir aaj usi bevafaa ki baat karein