fazaa kaa tang honaa fitrat-e-aazaad se puchho — Figar Unnavi

maayus dilon ko ab chheDo bhi to kyaa haasil
TuuTe hue paimaane fariyaad nahin karte

dil hai miraa rangini-e-aaghaaz pe maail
nazron mein abhi jaam hai anjaam nahin hai

ik teraa aasraa hai faqat ai khayaal-e-dost
sab bujh gae charaagh shab-e-intizaar mein

un pe qurbaan har khushi kar di
zindagi nazr-e-zindagi kar di

saaqi ne nigaahon se pilaa di hai ghazab ki
rindaan-e-azal dekhiye kab hosh mein aaein

partav-e-husn se zarre bhi bane aaine
kitne jalve kiye arzaan tiri raanaai ne

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

muddaton baa'd pashemaan huaa dariyaa ham se
muddaton baa'd hamein pyaas chhupaani aai

vo jis kaa naam paDaa hai khamosh logon mein
yahaan pe lafzon ke dariyaa bahaa rahaa thaa abhi

koi manzil aakhiri manzil nahin hoti 'fuzail'
zindagi bhi hai misaal-e-mauj-e-dariyaa raah-rau

tujh ko paa kar bhi tujhe paane ki khvaahish hai abhi
mere dariyaa tu alag teri ravaani hai alag

dariyaa ne shart baandhi thi qimat pe pyaas ki
ham ne bhi jaan de di magar tishnagi na di