zaahiri shakl meri zinda hai — Ishrat Qadri

yuun zindagi guzar rahi hai meri
jo un ki hai vahi khushi hai meri

ik saaya sharmaataa lajaataa raah mein tanhaa chhoD gayaa
main parchhaain DhunD rahaa huun TuuTi hui divaaron par

in andheron se pare is shab-e-gham se aage
ik nai subh bhi hai shaam-e-alam se aage

vo tere bichhaDne kaa samaan yaad jab aayaa
biite hue lamhon ko sisakte hue dekhaa

kaun dekhegaa mujh mein ab chehra
aaina thaa bikhar gayaa huun main

daryaaft kar ke khud ko zamaane se duur huun
har shakhs baa-shuur hai main be-shuur huun