in andheron se pare is shab-e-gham se aage — Ishrat Qadri

yuun zindagi guzar rahi hai meri
jo un ki hai vahi khushi hai meri

ik saaya sharmaataa lajaataa raah mein tanhaa chhoD gayaa
main parchhaain DhunD rahaa huun TuuTi hui divaaron par

vo tere bichhaDne kaa samaan yaad jab aayaa
biite hue lamhon ko sisakte hue dekhaa

kaun dekhegaa mujh mein ab chehra
aaina thaa bikhar gayaa huun main

zaahiri shakl meri zinda hai
aur andar se mar gayaa huun main

daryaaft kar ke khud ko zamaane se duur huun
har shakhs baa-shuur hai main be-shuur huun

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

tamaam umr jo hanstaa hi rah gayaa yaaro
balaa kaa dard thaa us shakhs ki kahaani mein

dasht-e-tanhaai mein jiine kaa saliqa sikhiye
ye shikasta baam-o-dar bhi ham-safar ho jaaeinge