phir khamoshi ne saaz chheDaa hai — Javed Akhtar

agar palak pe hai moti to ye nahin kaafi
hunar bhi chaahiye alfaaz mein pirone kaa

— Javed Akhtar

yahi haalaat ibtidaa se rahe
log ham se khafaa khafaa se rahe

— Javed Akhtar

hai paash paash magar phir bhi muskuraataa hai
vo chehra jaise ho TuuTe hue khilaune kaa

— Javed Akhtar

tab ham donon vaqt churaa kar laate the
ab milte hain jab bhi fursat hoti hai

— Javed Akhtar

main paa sakaa na kabhi is khalish se chhuTkaaraa
vo mujh se jiit bhi saktaa thaa jaane kyuun haaraa

— Javed Akhtar

isi jagah isi din to huaa thaa ye elaan
andhere haar gae zindabaad hindostaan

— Javed Akhtar

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

kai sitaaron ko main jaantaa huun bachpan se
kahin bhi jaaun mire saath saath chalte hain

— Bashir Badr

phuul afsurda bulbulein khaamosh
fasl gul aai hai khizaan-bar-dosh

— Hafeez Banarasi

mohabbat chikh bhi khaamoshi bhi naghma bhi naara bhi
ye ik mazmun hai kitne hi unvaanon se vaabasta

— Hafeez Merathi

khaamosh khaDaa huun main dar-e-khvaab se baahar
kyaa jaaniye kab tak isi haalat mein rahungaa

— Inam Nadeem