muskuraanaa kabhi na raas aayaa — Kunwar Mahendra Singh Bedi Sahar

gham-e-sud-o-ziyaan se be-niyaazaana nikaltaa hai
baDi farzaangi se teraa divaana nikaltaa hai

pareshaan the tiri mahfil se baahar
pashemaan hain tiri mahfil mein aa kar

ham un ke sitam ko bhi karam jaan rahe hain
aur vo hain ki is par bhi buraa maan rahe hain

in shokh hasinon ki niraali hai adaa bhi
but ho ke samajhte hain ki jaise hain khudaa bhi

kisi ik-aadh mai-kash se khataa kuchh ho gai hogi
magar kyuun mai-kade kaa mai-kada bad-naam hai saaqi

abhi vo kamsin ubhar rahaa hai abhi hai us par shabaab aadhaa
abhi jigar mein khalish hai aadhi abhi hai mujh par itaab aadhaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

bas is khayaal se kahin duniyaa na dekh le
likh kar tumhaaraa naam miTaanaa paDaa hamein

vo khiDki ab aur kisi ko takti hai
main ne bhi us gali mein jaanaa chhoD diyaa

na aae mere honTon tak jo paimaana nahin aataa
miri khuddaariyon ko haath phailaanaa nahin aataa