ai shahr-e-sitam-zaad tiri umr baDi ho — Khursheed Akbar

quraan kaa mafhum unhein kaun bataae
aankhon se jo chehron ki tilaavat nahin karte

shaam ke tiir se zakhmi hai 'khurshid' kaa siina
nuur simaT kar surkh kabutar ban jaataa hai

dard kaa zaaiqa bataaun kyaa
ye ilaaqa zabaan se baahar hai

vo ek aaina chehre ki baat kartaa hai
vo ek aaina patthar se hai ziyaada kyaa

dil hai ki tire paanv se paazeb giri hai
suntaa huun bahut der se jhankaar kahin ki

saahil se sunaa karte hain lahron ki kahaani
ye Thahre hue log baghaavat nahin karte

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

aap kaa koi safar be-samt be-manzil na ho
zindagi aisi na jiinaa jis kaa mustaqbil na ho

dard ki lahr mein zindagi bah gai
umr yuun kaT gai hijr ki shaam mein

maut se pahle jahaan mein chand saanson kaa azaab
zindagi jo qarz teraa thaa adaa kar aae hain