hadaf bhi mujh ko banaanaa hai aur mere harif — Manzoor Hashmi

tiis chaalis din to kaaT diye
aur kitne hain is mahine mein

— Manzoor Hashmi

qubul kaise karun un kaa faisla ki ye log
mire khilaaf hi meraa bayaan maangte hain

— Manzoor Hashmi

sunaa hai sachchi ho niyat to raah khulti hai
chalo safar na karein kam se kam iraada karein

— Manzoor Hashmi

kabhi kabhi to kisi ajnabi ke milne par
bahut puraanaa koi silsila nikaltaa hai

— Manzoor Hashmi

ik zamaana hai havaaon ki taraf
main charaaghon ki taraf ho jaaun

— Manzoor Hashmi

yaqin ho to koi raasta nikaltaa hai
havaa ki oT bhi le kar charaagh jaltaa hai

— Manzoor Hashmi

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

apni anaa ki aaj bhi taskin ham ne ki
ji bhar ke us ke husn ki tauhin ham ne ki

— Iqbal Sajid

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

— Shams Deobandi

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

ghurur bhi jo karun main to aajizi ho jaae
khudi mein lutf vo aae ki be-khudi ho jaae

— Riyaz Khairabadi

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha