ik zamaana hai havaaon ki taraf — Manzoor Hashmi

yaqin ho to koi raasta nikaltaa hai
havaa ki oT bhi le kar charaagh jaltaa hai

tiis chaalis din to kaaT diye
aur kitne hain is mahine mein

qubul kaise karun un kaa faisla ki ye log
mire khilaaf hi meraa bayaan maangte hain

sunaa hai sachchi ho niyat to raah khulti hai
chalo safar na karein kam se kam iraada karein

kabhi kabhi to kisi ajnabi ke milne par
bahut puraanaa koi silsila nikaltaa hai

hadaf bhi mujh ko banaanaa hai aur mere harif
mujhi se tiir mujhi se kamaan maangte hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa