ghurur bhi jo karun main to aajizi ho jaae — Riyaz Khairabadi

mai-khaane mein mazaar hamaaraa agar banaa
duniyaa yahi kahegi ki jannat mein ghar banaa

aap aae to khayaal-e-dil-e-naashaad aayaa
aap ne yaad dilaayaa to mujhe yaad aayaa

ham jaante hain lutf-e-taqaazaa-e-mai-farosh
vo naqd mein kahaan jo mazaa hai udhaar mein

baDe paak tinat baDe saaf baatin
'riyaaz' aap ko kuchh hamin jaante hain

ham jaam-e-mai ke bhi lab-e-tar chuste nahin
chaskaa paDaa huaa hai tumhaari zabaan kaa

aisi hi intizaar mein lazzat agar na ho
to do ghaDi firaaq mein apni basar na ho

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

Daraate ho hamein kyaa shaikh tum roz-e-qayaamat se
dar-e-jaanaan pe ham ne hashr barpaa khuub dekhaa hai

ye bhi koi zindagi mein zindagi hai ham-nafas
dil kahin hai ham kahin hain aur jaanaana kahin

aankhon ko tamanna hai khaak-e-dar-e-jaanaan ki
khaak-e-dar-e-har-kucha iksir nahin hoti