yaqin ho to koi raasta nikaltaa hai — Manzoor Hashmi

tiis chaalis din to kaaT diye
aur kitne hain is mahine mein

qubul kaise karun un kaa faisla ki ye log
mire khilaaf hi meraa bayaan maangte hain

sunaa hai sachchi ho niyat to raah khulti hai
chalo safar na karein kam se kam iraada karein

kabhi kabhi to kisi ajnabi ke milne par
bahut puraanaa koi silsila nikaltaa hai

ik zamaana hai havaaon ki taraf
main charaaghon ki taraf ho jaaun

hadaf bhi mujh ko banaanaa hai aur mere harif
mujhi se tiir mujhi se kamaan maangte hain

gham hai na ab khushi hai na ummid hai na yaas
sab se najaat paae zamaane guzar gae

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

nahin nahin main bahut khush rahaa huun tere baghair
yaqin kar ki ye haalat abhi abhi hui hai

ham ko un se vafaa ki hai ummid
jo nahin jaante vafaa kyaa hai

ishq ko naghma-e-ummid sunaa de aa kar
dil ki soi hui qismat ko jagaa de aa kar

zaahid umid-e-rahmat-e-haq aur hajv-e-mai
pahle sharaab pi ke gunaah-gaar bhi to ho