dost hi khubiyaan bataate hain — Masood Tanha

bahut khaamosh rahtaa hai jo 'tanhaa'
vo mahfil mein baraabar boltaa hai

bazm-e-yaaraan mein baiThtaa huun magar
meri jaanib harif dekhte hain

shahr mein raunaqein sahi 'tanhaa'
apne gaanv se mat kinaaraa kar

ye tamaashaa sar-e-baazaar nahin ho saktaa
har koi meraa kharidaar nahin ho saktaa

dasht-e-ghurbat mein ham-safar na banaa
ham kai mehrbaan chhoD aae

yaadon ke qaafile mein udaasi thi ham-rikaab
hijrat mein tere shahr se 'tanhaa' nahin gae

jab ki pahlu se yaar uThtaa hai
dard be-ikhtiyaar uThtaa hai

kitnaa chaalaak hai vo yaar-e-sitamgar dekho
us ne tohfe mein ghaDi di hai magar vaqt nahin

Dare huon ne tumhein bhi Daraa diyaa varna
khudaa to pyaar sikhaataa hai kuchh nahin kahtaa

yaar ke darsan ke khaatir jaan aur tan bhuul jaa
aankh munavvar dekh us kaa rang-e-gulshan bhuul jaa

dayaar-e-husn mein tajdid-e-'aashiqi ke liye
ham aise log zaruri hain har sadi ke liye

pyaar kaa donon pe aakhir jurm saabit ho gayaa
ye farishte aaj jannat se nikaale jaaeinge