Dare huon ne tumhein bhi Daraa diyaa varna — Ali Zaryoun

adaa-e-ishq huun puuri anaa ke saath huun main
khud apne saath huun yaani khudaa ke saath huun main

asr ke vaqt mere paas na baiTh
mujh pe ik saanvli kaa saaya hai

sukut-e-shaam kaa hissa tu mat banaa mujh ko
main rang huun so kisi mauj mein milaa mujh ko

main paanv dho ke piyun yaar ban ke jo aae
munaafiqon ko to main munh lagaane vaalaa nahin

kyaa hai jo mujhe hukm nahin maanne aate
divaana to hotaa hi baghaavat ke liye hai

vaa'iz main koi chor huun jo tujh se dabungaa
munh toD ke rakh dungaa agar talkh huaa tu

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

tere shaidaa bhi hue ishq-e-tamaashaa bhi hue
tere divaane tire shahr mein rusvaa bhi hue

aataa rahaa huun yaad main us ko tamaam umr
is zaaviye se ishq mein naakaam kab huaa

kyaa kahaa ishq jaavedaani hai!
aakhiri baar mil rahi ho kyaa

dil kaun hai ki us se kahein raaz-e-ishq ham
tere khayaal se bhi na ham guftugu karein