jism thak haar ke so jaataa hai har shab lekin — Reshma Zaidi

mujh se qafas kaa darvaaza kyaa TuTegaa
paanv paDi zanjir mein khoi rahti huun

ai kuza-gar de shakl mujhe ik charaagh ki
jis se kisi dayaar ko raushan main kar sakun

miri hatheli pe jo hijr ki lakirein hain
tire visaal se har vaqt rokti hain mujhe

chalo khizaaon mein zikr-e-bahaar karte hain
ki be-qaraar tabi'at ko kuchh qaraar aae

pahle to tasvir banaati huun teri
phir teri tasvir mein khoi rahti huun

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

vo miri subhon kaa taaraa vo miri raaton kaa chaand
mere dil ki raushni to thaa magar meraa na thaa

ab bhi vahi din raat hain lekin farq ye hai
pahle bolaa karte the ab sunte hain