muddat hui hai bichhDe hue apne-aap se — Saghar Khayyami

chehre to jhurriyon se bhare dil javaan hain
din mein hain shaikh raat mein salmaan-khaan hain

ab aap hi bataaein vo kaise nibhaaegaa
jis ko nasib dum nahin vo kyaa hilaae gaa

ek qaidi subh ko phaansi lagaa kar mar gayaa
raat bhar ghazlein sunaain us ko thaanedaar ne

mahngaai ke zamaane mein bachchon ki rel-pel
aisaa na ho kamar tiri mahngaai toD de

hamaare laal ko darkaar hai vahi laDki
ki jis kaa baap police mein ho kam se kam deputy

kitne chehre lage hain chehron par
kyaa haqiqat hai aur siyaasat kyaa

mere khvaabon ke jharokon ko sajaate rahiye
na sahi vasl magar yaad to aate rahiye

yaad nahin kyaa kyaa dekhaa thaa saare manzar bhuul gae
us ki galiyon se jab lauTe apnaa bhi ghar bhuul gae

aa gayaa yaad unhein apne kisi gham kaa hisaab
hansne vaalon ne mire ashk jo gin ke dekhe

ek jhonkaa is tarah zanjir-e-dar khaDkaa gayaa
main ye samjhaa bhulne vaale ko main yaad aa gayaa

sajaa kar chaar-su rangin mahal tere khayaalon ke
tiri yaadon ki raanaai mein zebaai mein jiite hain

ulfat-e-sayyaad se majbur huun ai ham-nafas
varna ab bhi baazuon mein quvvat-e-parvaaz hai