Shayari Of Saghar Khayyami

un ke gunāh kyā kaheñ kis kis ke sar ga.e
tum ko ḳhabar nahīñ ka.ī ustād mar ga.e

hamāre laal ko darkār hai vahī laḌkī
ki jis kā baap police meñ ho kam se kam deputy

mehñdī lage vo haath vo miinā sī uñgliyāñ
ham ko tabāh kar ga.iiñ dillī kī laḌkiyāñ

urdu adab meñ jo bhī hamārā maqām hai
ustād-e-mohtaram ke vo bheje kā kaam hai

dekhe jo qais husn to lailā ko bhuul jaa.e
ham kyā haiñ rīsh-e-hazrat-maulānā jhuul jaa.e

karvaToñ se bus kī bus meñ aur halchal ho ga.ī
dāstān-e-ishq kitnoñ kī mukammal ho ga.ī

kahne lagī ye maut ki kiije hameñ muaaf
allāh shā.eroñ ke hamesha se hai ḳhilāf

dīvāngī meñ chaak garebāñ kiye hue
lailā milegī baal pareshāñ kiye hue

dekh liijo jānvar sar par biThā.e jā.eñge
aadmī kī khaal ke juute banā.e jā.eñge

shab bhar maiñ torch Daal ke ye dekhtā rahā
bijlī kā balb jaltā hai yā hai bujhā huā

mahñgā.ī ke zamāne meñ bachchoñ kī rel-pel
aisā na ho kamar tirī mahñgā.ī toḌ de

aa.ī sadā-e-haq ki yahī band-o-bast haiñ
tere vatan ke log to murda-parast haiñ