yaad nahin kyaa kyaa dekhaa thaa saare manzar bhuul gae — Nazeer Baaqri

khuub gae pardes ki apne divaar-o-dar bhuul gae
shish-mahal ne aisaa gheraa miTTi ke ghar bhuul gae

is liye chal na sakaa koi bhi khanjar mujh par
meri shah-rag pe miri maan ki duaa rakkhi thi

main ne duniyaa chhoD di lekin miraa murda badan
ek uljhan ki tarah qaatil ki nazron mein rahaa

khaDaa huun aaj bhi roTi ke chaar harf liye
savaal ye hai kitaabon ne kyaa diyaa mujh ko

zakhm kitne tiri chaahat se mile hain mujh ko
sochtaa huun ki kahun tujh se magar jaane de

apni aankhon ke samundar mein utar jaane de
teraa mujrim huun mujhe Duub ke mar jaane de

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein