thaa anal-haq lab-e-mansur pe kyaa aap se aap — Sahir Dehlavi

ahd-e-misaaq kaa laazim hai adab ai vaaiz
hai ye paimaan-e-vafaa rishta-e-zunnaar na toD

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

mil-milaa ke donon ne dil ko kar diyaa barbaad
husn ne kiyaa be-khud ishq ne kiyaa aazaad

jo laa-mazhab ho us ko millat-o-mashrab se kyaa matlab
miraa mashrab hai rindi rind ko mazhab se kyaa matlab

aate hue is tan mein na jaate hue tan se
hai jaan-e-makin ko na lagaavaT na rukaavaT

qadam hai ain hudus aur hudus ain qadam
jo tu na jalve mein aataa to main kahaan hotaa

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

ye maskharon ko vazife yunhi nahin milte
raiis khud nahin hanste hansaanaa paDtaa hai

Thaharnaa bhi miraa jaanaa shumaar hone lagaa
paDe paDe main puraanaa shumaar hone lagaa

kai logon ne phalte phulte peDon se jaanaa hai
magar main ne tujhe sabze ki uryaani se pahchaanaa

koi daanaa koi divaana milaa
shahar mein har shakhs begaana milaa