vo be-khudi thi mohabbat ki be-rukhi to na thi — Saleem Ahmed

ye nahin hai ki navaaze na gae hon ham log
ham ko sarkaar se tamgha milaa rusvaai kaa

— Saleem Ahmed

main gham ko basaa rahaa huun dil mein
be-ghar ko makaan de rahaa huun

— Saleem Ahmed

ghar mein kuchh kam hai ye ehsaas bhi hotaa hai 'salim'
ye bhi khultaa nahin kis shai ki kami lagti hai

— Saleem Ahmed

jaane andar kyaa huaa main shor sun kar ai 'salim'
us jagah pahunchaa to dekhaa band vo darvaaza thaa

— Saleem Ahmed

ik aag si jalti rahi taa-umr lahu mein
ham apne hi ehsaas mein pakte rahe taa-der

— Saleem Ahmed

khush-numaa lafzon ki rishvat de ke raazi kijiye
ruuh ki tauhin par aamaada rahtaa hai badan

— Saleem Ahmed

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri