'ajib Dhang se mujh ko mili hai aazaadi — Salman Saeed

manaayaa jaa rahaa hai gham tumhaaraa
puraani film dekhi jaa rahi hai

hamaare khel ki guDiyaa tumhi ho
tumhaare khel kaa guDDaa nayaa hai

khuun se mazlum ke ho to gae raushan charaagh
raushni aisi hui phir shahr andhaa ho gayaa

faqat ye lakDi nahin hai tumhaari baisaakhi
shajar ke haath kaTe hain ise banaane mein

us ne khat mein banaaein hain aansu
main bhi ab siskiyaan banaaungaa

kisi bhi darja ri'aayat nahin hai vahshat mein
bichhaD ke us se tumhein qahqahe lagaane the

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

kin shahidon ke lahu ke ye farozaan hain charaagh
raushni si jo hai zindaan ke har ik rauzan mein

ghurbat bas ab tariq-e-mohabbat ko qata kar
muddat hui hai ahl-e-vatan se judaa hue

kabhi to shahidon ki qabron pe aao
ye sab ghar tumhaare basaae hue hain

shahidon kaa tire shohra zamin se aasmaan tak hai
falak se balki aage baDh ke tere aastaan tak hai

kis shaan se gae hain shahidaan-e-ku-e-yaar
qaatil bhi haath uThaa ke sharik-e-duaa hue