aap se chuuk ho gai shaayad — Unwan Chishti

is kaar-e-numaayaan ke shaahid hain chaman vaale
gulshan mein bahaaron ko laae the hamin pahle

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

vo haadse bhi dahr mein ham par guzar gae
jiine ki aarzu mein kai baar mar gae

ishq phir ishq hai aashufta-sari maange hai
hosh ke daur mein bhi jaama-dari maange hai

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai