main kis tarah tujhe ilzaam-e-bevafaai duun — Unwan Chishti

is kaar-e-numaayaan ke shaahid hain chaman vaale
gulshan mein bahaaron ko laae the hamin pahle

pareshaan ho ke dil tark-e-taalluq par hai aamaada
mohabbat mein ye surat bhi na raas aai to kyaa hogaa

vo haadse bhi dahr mein ham par guzar gae
jiine ki aarzu mein kai baar mar gae

aap se chuuk ho gai shaayad
aap aur mujh pe mehrbaan kyaa khuub

ishq phir ishq hai aashufta-sari maange hai
hosh ke daur mein bhi jaama-dari maange hai

miri samajh mein aa gayaa har ek raaz-e-zindagi
jo dil pe choT paD gai to duur tak nazar gai

adaavatein thin, taghaaful thaa, ranjishein thiin bahut
bichhaDne vaale mein sab kuchh thaa, bevafaai na thi

yaqin un ke vaade pe laanaa paDegaa
ye dhokaa to daanista khaanaa paDegaa

shikaayat us se nahin apne-aap se hai mujhe
vo bevafaa thaa to main aas kyuun lagaa baiThaa

us bevafaa kaa shahr hai aur vaqt-e-shaam hai
aaise mein aarzu baDi himmat kaa kaam hai

bevafaai kaa mujhe ilzaam detaa thaa vo shakhs
main ne bhi itnaa kiyaa bas us ko sachchaa kar diyaa

be-muravvat ho bevafaa ho tum
apne matlab ke aashnaa ho tum