maalum hai 'urfi' jo hai qismat mein hamaari — Urfi Aafaqi

divaana-vaar naachiye hansiye gulon ke saath
kaanTe agar milein to jigar mein chubhoiye

chalaa thaa main to samundar ki tishnagi le kar
milaa ye kaisaa saraabon kaa silsila mujh ko

vo aae jaataa hai kab se par aa nahin jaataa
vahi sadaa-e-qadam kaa hai silsila ki jo thaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

raat bhar koi suraj dahaktaa lage
meri aankhon ke ye nuur aansu ajab

tere viraan shab-o-roz bhi rangin honge
bas kisi tarah hasinon se shanaasaai kar