lipaT jaate haiñ vo bijlī ke Dar se — Shayari Of Dagh Dehlvi

shab-e-visāl hai gul kar do in charāġhoñ ko
ḳhushī kī bazm meñ kyā kaam jalne vāloñ kā

nahīñ khel ai 'dāġh' yāroñ se kah do
ki aatī hai urdu zabāñ aate aate

jis meñ lākhoñ baras kī hūreñ hoñ
aisī jannat ko kyā kare koī

ḳhuub parda hai ki chilman se lage baiThe haiñ
saaf chhupte bhī nahīñ sāmne aate bhī nahīñ

is nahīñ kā koī ilaaj nahīñ
roz kahte haiñ aap aaj nahīñ

aa.ina dekh ke kahte haiñ sañvarne vaale
aaj be-maut mareñge mire marne vaale

ḳhud apne se milne kā to yaarā na thā mujh meñ
maiñ bhiiḌ meñ gum ho ga.ī tanhā.ī ke Dar se

gar baazī ishq kī baazī hai jo chāho lagā do Dar kaisā
gar jiit ga.e to kyā kahnā haare bhī to baazī maat nahīñ

dil hī to hai siyāsat-e-darbāñ se Dar gayā
maiñ aur jā.ūñ dar se tire bin sadā kiye

hai kyā jo kas ke bāñdhiye merī balā Dare
kyā jāntā nahīñ huuñ tumhārī kamar ko maiñ

Dar hai na dupaTTa kahīñ siine se sarak jaa.e
pañkhā bhī hameñ paas se jhalne nahīñ dete

mere ghar meñ ġhair ke Dar se kabhī chhup jā.iye
ġhair ke ghar meñ chhupe the aaj kis kī Dar se aap