Idris Babar

TuuT sakta hai chhalak sakta hai chhin sakta hai
itna soche to koi jaam uchhale kaise

vo mujhe dekh kar khamosh raha
aur ik shor mach gaya mujh men

tamam dost alaav ke gird jam.a the aur
har ek apni kahani sunane vaala tha

haath duniya ka bhi hai dil ki kharabi men bahut
phir bhi ai dost tiri ek nazar se kam hai

maut ki pahli alamat sahib
yahi ehsas ka mar jaana hai

dard ka dil ka shaam ka bazm ka mai ka jaam ka
rang badal badal gaya ek nazar ke saath saath

pachaas miil hai khushki se bahriya-town
bas ek ghanTe mein achchhaa zamaana aataa hai

kahaaniyon ne miri aadatein bigaaDi thiin
main sirf sach ko zafar-yaab dekh saktaa thaa

dil ki ik ek kharaabi kaa sabab jaante hain
phir bhi mumkin hai ki ham tum se muravvat kar jaaein

reg-e-dil mein kai naadida parinde bhi hain dafn
sochte honge ki dariyaa ki ziyaarat kar jaaein

haan ai ghubaar-e-aashnaa main bhi thaa ham-safar tiraa
pi gaiin manzilein tujhe khaa gae raaste mujhe

ik khauf-zada saa shakhs ghar tak
pahunchaa kai raaston mein baT kar