Shayari Of Mohammad Izhar Ul Haq

"barūn-e-dar nikalte hī bahut ghabrā gayā huuñ maiñ jis duniyā meñ thā kyuuñ us se vāpas aa gayā huuñ koī sayyāra mere aur us ke darmiyāñ hai maiñ kyā thā aur dekho kis tarah gahnā gayā huuñ mujhe raas aa na pā.eñge ye paanī aur miTTī ki maiñ ik aur miTTī se huuñ aur murjhā gayā huuñ maiñ patthar chuum kar tahlīl ho jāatā havā meñ magar zinda huuñ aur haihāt vāpas aa gayā huuñ kahāñ maiñ aur kahāñ darbār kā jahl-o-takabbur magar ik ism kī tasbīh jis se chhā gayā huuñ"

"namak in āñsuoñ meñ kam na thā par nam bahut achchhā gharoñ meñ dāna-e-gandum na thā mātam bahut thā mirī āñkhoñ pe bhī zartār parde jhūlte the tire bāloñ meñ bhī kuchh in dinoñ resham bahut thā maze saare tamāsha-gāh-e-duniyā meñ uThā.e magar ik baat jo dil meñ thī jis kā ġham bahut thā siyāhī raat kī pīchhe samundar din kā aage sitāra sub.h kā merī tarah maddham bahut thā badalte jā rahe the jism apnī hai.ateñ bhī ki rasta tañg thā aur yuuñ ki us meñ ḳham bahut thā"

"paḌe hue haiñ mire jism o jaañ mire pīchhe hai ek lashkar-e-ġhārat-girāñ mire pīchhe pas-e-vafāt ye be-dastaḳhat mirī tahrīr nahīñ hai aur koī bhī nishāñ mire pīchhe mire mulāzim o ḳhargāh asp aur shatranj sab aa.eñ nazm se mātam-kunāñ mire pīchhe guzar rahī hai añdhere meñ us badan par kyā na khul sakegī yahī chīstāñ mire pīchhe uThī huī mire sar par azal se hai talvār khiñchī huī hai abad se kamāñ mire pīchhe ghirā huā huuñ janam-din se is ta.āqub meñ zamīn aage hai aur āsmāñ mire pīchhe"

tirā paañv shaam pe aa gayā thā ki chāñd thā
tirā hijr sub.h ko jal uThā thā ki phuul thā

añdherī shaam thī bādal baras na paa.e the
vo mere paas na thā aur maiñ khul ke royā thā

koī zaarī sunī nahīñ jaatī koī jurm muaaf nahīñ hotā
is dhartī par is chhat ke tale koī tere ḳhilāf nahīñ hotā

ghirā huā huuñ janam-din se is ta.āqub meñ
zamīn aage hai aur āsmāñ mire pīchhe

"dasht-navardī meñ koī saat thā maiñ bhī ajab manzar-e-bāġhāt thā zarra thā yā ḳhaar thā jo kuchh bhī thā mere liye shāreh-e-āyāt thā Duub ga.e is meñ ka.ī puure chāñd dar tirā chāh-e-tilismāt thā mujh ko ye dhun saa.e meñ baiTheñ kahīñ tujh ko magar shauq-e-muhimmāt thā paañv tale uḌtā huā taḳht-e-zar sar pe mire sāya-e-jinnāt thā"

"lahū meñ kyā batā.eñ raushnī kaisī milī thī milī thī bas mohabbat jis tarah kī bhī milī thī bahut sī jam' kar rakkhī thiiñ us ne kahkashā.eñ maiñ royā to mujhe ik qaash sūraj kī milī thī uThāte kis tarah palkoñ kī lambā.ī kā jhagḌā bahut mushkil se āñkheñ aur bīnā.ī milī thī hayā thī aañkh meñ gandum ke ḳhoshe haath meñ the 'ajab hālat meñ thī jab mujh ko uryānī milī thī yahīñ thī jo nazar aa.ī thī mash'al thī ki ātish nubuvvat thī ki chingārī zamīñ par hī milī thī"

"ḳhizāñ tujh par ye kaisā barg-o-bār aane lagā hai mujhe ab mausamoñ par e'tibār aane lagā hai kahāñ dopahr kī hiddat kahāñ ThanDak shafaq kī siyah resham meñ chāñdī kā ġhubār aane lagā hai khuleñge vasl ke dar dūsrī duniyāoñ meñ bhī bil-āḳhir hijr ke ruḳh par nikhār aane lagā hai mire asbāb meñ mashkīza-o-ḳhurjīn rakhnā safar kī shaam hai aur regzār aane lagā hai falak ko baar baar ahl-e-zamīñ yuuñ dekhte haiñ ki jaise ġhaib se koī savār aane lagā hai"

"ek charāġh yahāñ merā hai ek diyā vahāñ terā biich meñ aqlīmeñ paḌtī haiñ paanī aur añdherā koī na jaane kaun sā lafz hai jis se jī uTThūñgā jis taa.ir meñ jaan hai merī us kā duur baserā sāhil par to haath ko haath sujhā.ī nahīñ detā hai shāyad kisī jahāz meñ bhar kar laa.e koī saverā bharā huā hai jānvaroñ aur sāñpoñ se ye jañgal hijr dikhā.ī detā thā bāhar se sabz ghanerā dhuup aur bārish bhejne vaale merī bhī sun lenā tere baaġh ke goshe meñ ik kachchā phuul hai merā"

"vajūd par inhisār maiñ ne nahīñ kiyā thā ki ḳhaak kā e'tibār maiñ ne nahīñ kiyā thā safed resham kī oḌhnī mere haath meñ thī magar use dāġh-dār maiñ ne nahīñ kiyā thā ye be-niyāzī kī ḳhū mire husn meñ bahut thī magar use be-qarār maiñ ne nahīñ kiyā thā milā thā ḳhorajīn meñ liye merā kāsa-e-sar magar use sharmsār maiñ ne nahīñ kiyā thā kahīñ se yak-laḳht zindagī merī kaaT degā jo rāsta iḳhtiyār maiñ ne nahīñ kiyā thā sumoñ-tale rauñd de ḳhushī se magar ye sun le gunāh ai shahsavār! maiñ ne nahīñ kiyā thā dikhā.ī dene lagā vo ik tīsrā kinārā abhī javānī ko paar maiñ ne nahīñ kiyā thā ġhurūb kā vaqt thā muqarrar so chal paḌā maiñ kisī kā phir intizār maiñ ne nahīñ kiyā thā"