Neel Ahmed

khud-farebi rahe to achchhaa hai
khud-shanaasi tabaah kar degi

kisi ko yaad karne ke nahin makhsus kuchh lamhe
koi jab yaad aa jaae to phir vo yaad aataa hai

phulon ki zad mein aa ke kahin jaan se na jaae
main ne isi khayaal se titli uDaai hai

saare jazbe tiri chaahat ke dikhaai dete
kaash aankhon mein kahin dil bhi dhaDaktaa hotaa

yuun to mohabbaton mein baDi qurbatein rahin
lekin jo dil se puchho to khalvat kamaai hai

apni aankhon ko noch Daalaa hai
tum ko paane ke khvaab bunti hain

havaa kaa rang nahin hai magar mizaaj to hai
havaa se dosti karnaa koi mazaaq nahin

siine se dil nikaal ke haathon pe rakh diyaa
main ne to bas kahaa thaa ki dhaDkan kaa shor hai

mire siine se lag kar der tak roti hai tanhaai
kisi ne kah diyaa us se mohabbat ho gai mujh ko

qaid kar lo mujhe khayaalon mein
is jahaan se rihaai mil jaae

apni aankhein nahin jalaaungi
main ne bujhte charaagh dekhe hain

kitne aalam guzar gae mujh par
tum ko sochaa thaa ek lamhe ko