Tanhai Shayari Collection

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

laazim thaa ki dekho miraa rastaa koi din aur
tanhaa gae kyuun ab raho tanhaa koi din aur

tanhaa rahne mein bhi koi uzr nahin hai
lekin us ke saath hi tanhaa rah saktaa huun

shab ki tanhaai mein ab to akasr
guftugu tujh se rahaa karti hai

ek mahfil mein kai mahfilein hoti hain sharik
jis ko bhi paas se dekhoge akelaa hogaa

itne ghane baadal ke pichhe
kitnaa tanhaa hogaa chaand

mujh se chhuDvaae mire saare usuul us ne 'zafar'
kitnaa chaalaak thaa maaraa mujhe tanhaa kar ke

khud apne se milne kaa to yaaraa na thaa mujh mein
main bhiiD mein gum ho gai tanhaai ke Dar se

baahar gali mein chalte hue log thak gae
tanhaaiyon kaa shor thaa khaali makaan mein

us kaa kyaa hai tum na sahi to chaahne vaale aur bahut
tark-e-mohabbat karne vaalo tum tanhaa rah jaaoge

har taraf har jagah be-shumaar aadmi
phir bhi tanhaaiyon kaa shikaar aadmi

meri chaadar to chhini thi shaam ki tanhaai mein
be-ridaai ko miri phir de gayaa tashhir kaun

ham ahl-e-qafas tanhaa bhi nahin har roz nasim-e-subh-e-vatan
yaadon se moattar aati hai ashkon se munavvar jaati hai

kaanp uThti huun main ye soch ke tanhaai mein
mere chehre pe tiraa naam na paDh le koi

angDaai par angDaai leti hai raat judaai ki
tum kyaa samjho tum kyaa jaano baat miri tanhaai ki

akelaa us ko na chhoDaa jo ghar se niklaa vo
har ik bahaane se main us sanam ke saath rahaa

us ke dushman hain bahut aadmi achchhaa hogaa
vo bhi meri hi tarah shahr mein tanhaa hogaa

kaav kaav-e-sakht-jaani haae-tanhaai na puchh
subh karnaa shaam kaa laanaa hai ju-e-shir kaa

achchhaa hai dil ke saath rahe paasbaan-e-aql
lekin kabhi kabhi ise tanhaa bhi chhoD de

tere hote hue aa jaati thi saari duniyaa
aaj tanhaa huun to koi nahin aane vaalaa

saamne umr paDi hai shab-e-tanhaai ki
vo mujhe chhoD gayaa shaam se pahle pahle

aao tum hi karo masihaai
ab bahalti nahin hai tanhaai

main tanhaa thaa main tanhaa huun
tum aao to kyaa na aao to kyaa