Muneer Niyazi

shāyad is raah pe kuchh aur bhī raahī aa.eñ
dhuup meñ chaltā rahūñ saa.e bichhā.e jā.ūñ

raushnī aadhī idhar aadhī udhar
ik diyā rakkhā hai dīvāroñ ke biich

javānī kyā huī ik raat kī kahānī huī
badan purānā huā ruuh bhī purānī huī

palaT sakūñ hī na aage hī baḌh sakūñ jis par
mujhe ye kaun se raste lagā gayā ik shaḳhs

hazār tarah ke sadme uThāne vaale log
na jaane kyā huā ik aan meñ bikhar se ga.e

duā karo ki maiñ us ke liye duā ho jā.ūñ
vo ek shaḳhs jo dil ko duā sā lagtā hai

havā ke dosh pe rakkhe hue charāġh haiñ ham
jo bujh ga.e to havā se shikāyateñ kaisī

mujhe kamāl-e-suḳhan se navāzne vaale
samā'atoñ ko bhī ab zauq-e-āshnā.ī de

agar hoñ kachche gharoñdoñ meñ aadmī ābād
to ek abr bhī sailāb ke barābar hai

koī aur to nahīñ hai pas-e-ḳhanjar-āzmā.ī
hamīñ qatl ho rahe haiñ hamīñ qatl kar rahe haiñ

aañkh se duur sahī dil se kahāñ jā.egā
jaane vaale tū hameñ yaad bahut aa.egā

tum apne rang nahāo maiñ apnī mauj uḌuuñ
vo baat bhuul bhī jaao jo ānī-jānī huī