be-samt raaston pe sadaa le gai mujhe — Iffat Zarrin

"aable suukh chuke phir bhi kasak baaqi hai dil ke har zakhm mein yaadon ki mahak baaqi hai chhoD duun kaise bhalaa apne buzurgon kaa chalan meri rag rag mein abhi un kaa namak baaqi hai jin ke saae mein bahal jaataa thaa bachpan aksar mere ehsaas mein ab tak vo dhanak baaqi hai tum ko aanaa hai to aa jaao ba-sad-shauq yahaan ab bhi haalaat mein halki si lachak baaqi hai band hoti nahin palkein miri sadiyaan guzrin khvaab to TuuT chuke sirf chamak baaqi hai dil ki dhaDkan miri aavaaz-e-anaa hai 'zarrin' mere har lafz mein lahje ki khanak baaqi hai"

"kaarvaan sust-musaafir ko sazaa detaa hai zard patte ko har ik peD giraa detaa hai apni aankhon ko vo be-vajh sazaa detaa hai giile indhan ko agar koi havaa detaa hai ab mire bas mein kahaan hai ki main vaapas aauun meraa maazi mujhe bekaar sadaa detaa hai kis liye tu ne bujhaa Daale sulagte sapne kis liye ab inhein rah rah ke havaa detaa hai zindagi ham ne banaai hai 'amal se lekin ham bhi kahte hain ye hi sab ko khudaa detaa hai ek bahtaa huaa tinkaa bhi aham hai 'zarrin' apni raftaar se dariyaa kaa pataa detaa hai"

"baarish-e-ashk bazaahir to suhaani hogi haan magar 'umr samundar mein ganvaani hogi mash'alein saath rakho raat bhayaanak hai bahut aag jangal mein bahar-gaam jalaani hogi main musavvir huun mire fan kaa taqaazaa hai yahi mujh ko dushman ki bhi tasvir banaani hogi yuun to patthar ki bhi qismat hai hasin taaj-mahal apni taqdir magar aap banaani hogi aaj to zakhm ke phulon ki mahak hai taaza kal tum aae bhi to har baat puraani hogi mujh ko ehsaas ke paikar mein na DhunDo logo meri aavaaz tumhein DhunD ke laani hogi ham ne har 'ahd se samjhautaa kiyaa hai 'zarrin' kuchh bhi ho ab to har ik baat nibhaani hogi"

"ruuh jismon se baahar bhaTakti rahi zakhmi yaadon ko aanchal se Dhakti rahi mere haathon mein thiin gard ki chaadarein zindagi thi ke daaman jhaTakti rahi chaandni mein hasin zahr ghultaa rahaa sar ko marmar pe naagin paTakti rahi main ghaTaaon se khud ko bachaati rahi tegh bijli ki sar pe laTakti rahi mere honTon ko kab mil saki baansuri saans 'zarrin' labon pe aTakti rahi"

"ajiib karb-e-musalsal dil-o-nazar mein rahaa vo raushni kaa musaafir andhere ghar mein rahaa vo chaandni kaa muraqqaa nahin thaa jugnu thaa charaagh ban ke jalaa aur shajar shajar mein rahaa kahaavaton ki tarah vo bhi shahr-e-maani thaa bujhaa bujhaa saa diyaa jo kisi khanDar mein rahaa vo jis ko khoj saraabon mein thi samundar ki vo apne dasht-e-dil-o-jaan ki rahguzar mein rahaa vahi to naqsh-e-qadam the jo saare miTte gae vo daagh-e-sajda thaa baaqi jo sang-e-dar mein rahaa yahi tilism thaa 'zarrin' jise na toD saki vajud us kaa to taqdir ke bhanvar mein rahaa"

"jism-o-jaan ki basti mein silsile nahin milte ab kisi bhi markaz se daaere nahin milte do-qadam bichhaDne se qaafile nahin milte manzilein to milti hain raaste nahin milte baarhaa taraashaa hai ham ne aap kaa chehra aap ko na jaane kyuun aaine nahin milte vaqt ki kami kah kar jehl ko chhupaate hain aaj-kal kitaabon mein haashiye nahin milte aaj bhi zamaane mein aadmi karishma hain shoabde to milte hain moajize nahin milte zindagi kaa har lamha aarzu kaa dushman hai haadson ki khvaahish mein haadse nahin milte aaj qatl karnaa bhi ban gayaa hai fan 'zarrin' qatl karne vaalon ke kuchh pate nahin milte"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"