gai fasl-e-bahaar gulshan se — Mardan Ali Khan Rana

"baashinde haqiqat mein hain ham mulk-e-baqaa ke kuchh roz se mehmaan hain is daar-e-fanaa ke dil khuun ho shab-e-vasl bhi hasrat mein na kyun-kar dekhein na vo khalvat mein bhi jab aankh uThaa ke farmaaiye ham se thi yahi shart-e-mohabbat khuub aap ne rusvaa kiyaa ghairon mein bulaa ke kuche mein na aae koi main jaan gayaa huun farmaate ho mujh se ye raqibon ko sunaa ke dil haath se kho jaataa hai kis taur se zaahid to aap zaraa dekh le us kuche mein jaa ke khaak-e-dar-e-jaanaan hai libaas-e-tan-e-uryaan aashiq tire mohtaaj nahin aur qabaa ke ham sar ke bal aaeinge jo bulvaaoge saahab gar ho na yaqin dekh lo tum chaaho bulaa ke ho saaya-e-divaar tumhaaraa jo mayassar phir kyaa karein farmaaiye saae ko humaa ke dil khol ke kar lijiye ai hazrat-e-dil sair ham phir ke na phir aaeinge is bazm se jaa ke tan khaak mein mil jaaegaa ik roz hamaaraa ji tan se nikal jaaegaa maanind havaa ke"

"kar diyaa zaar gham-e-ishq ne aisaa mujh ko maut aai bhi to bistar pe na paayaa mujh ko kabhi jangal kabhi basti mein phiraayaa mujh ko aah kyaa kyaa na kiyaa ishq ne rusvaa mujh ko dushman-e-jaan huaa dar-parda miraa jazba-e-ishq munh chhupaane lage vo jaan ke shaidaa mujh ko roz-e-raushan ho na kyunkar miri aankhon mein siyaah hai tire gesu-e-shab-rang kaa saudaa mujh ko ik pari-ru ki mohabbat kaa main huun divaana na pari kaa na kisi jin kaa hai saaya mujh ko roz-o-shab shokh ne kyaa kyaa na dikhaae nairang rukh dikhaayaa kabhi gesu-e-chalipaa mujh ko din bhale aae to aadaa sabab-e-khair hue bad-duaa ne kiyaa aghyaar ki achchhaa mujh ko fakhr se bazm-e-butaan mein vo kahaa karte hain pyaar kuchh roz se ab karte hain 'raanaa' mujh ko"

"tegh-e-nigah-e-dida-e-khun-khaar nikaali kyuun aap ne ushshaaq pe talvaar nikaali bhule hain ghazaalaan-e-haram raah khataa se tum ne ajab andaaz ki raftaar nikaali dhaDkaa mire naale kaa rahaa murgh-e-sahar ko aavaaz shab-e-vasl na zinhaar nikaali har ghar mein kahe rakhte hain kohraam paDegaa gar laash hamaari sar-e-baazaar nikaali aakhir miri turbat se ugi hai gul-e-nargis kyaa baad-e-fanaa hasrat-e-didaar nikaali main vasl kaa saail huun na vaade kaa talab-gaar baaton mein abas aap ne takraar nikaali jal jaaegaa ye khirman-e-hasti abhi ai dil siine se agar aah-e-sharar-baar nikaali dil le ke bhi 'raanaa' kaa kiyaa paas na afsos kuchh hasrat-e-dil tu ne na ayyaar nikaali"

"gai jo tifli to phir aalam-e-shabaab aayaa gayaa shabaab to ab mausam-e-khizaab aayaa main shauq-e-vasl mein kyaa rail par shitaab aayaa ki subh hind mein thaa shaam panj-aab aayaa kaTaa thaa roz-e-musibat khudaa khudaa kar ke ye raat aai ki sar pe mire 'azaab aayaa kahaan hai dil ko 'abas DhunDhte ho pahlu mein tumhaare kuche mein muddat se us ko daab aayaa kisi ki tegh-e-taghaaful kaa main vo kushta huun na jaagaa neze pe sau baar aaftaab aayaa nazar paDi na miri ro'b-e-husn se rukh par agarche saamne mere vo be-naqaab aayaa hamesha surat-e-anjum khuli rahin aankhein firaaq-e-yaar mein kis roz mujh ko khvaab aayaa huaa yaqin ki zamin par hai aaj chaand-gahan vo maah chehre pe jab Daal kar naqaab aayaa hue jo dida-e-girya se apne ashk ravaan gumaan huaa ki barastaa huaa sahaab aayaa banaa tasavvur-e-lailaa ba-surat-e-tasvir kabhi jo qais ki aankhon mein shab ko khvaab aayaa vo zud-ranj hai us ko na chheDnaa 'raa'naa' maloge haath agar bar-sar-e-itaab aayaa"

"kar chukaa qaid se jis vaqt ki aazaad mujhe haath maltaa hi rahaa dekh ke sayyaad mujhe umr bhar yuun to kabhi li bhi na karvaT pas-e-marg haif rah-rah ke kiyaa karte hain ab yaad mujhe hukm darbaan ko hai zinhaar na aane paae ghair ke saamne karte hain magar yaad mujhe baaghbaan gulshan-e-aalam kaa main vo bulbul huun taaer-e-sidra kahaa kartaa hai ustaad mujhe ham-safiron ko miraa haal khulegaa pas-e-marg dekhnaa dil mein kareinge vo bahut yaad mujhe sahn-e-gulshan mein mire phuul kareinge gulchin roegaa suunaa qafas dekh ke sayyaad mujhe raah-e-ulfat mein mulaaqaat hui kis kis se dasht mein qais milaa koh mein farhaad mujhe ghaib se hote hain ilqaa mire dil mein mazmun dekh faizaan sukhan kaa hai khudaa-daad mujhe sabz baagh aataa hai duniyaa kaa nazar jab 'raanaa' yaad aati hai bahut hasrat-e-shaddaad mujhe"

"pise hain dil ziyaada-tar hinaa se chalaa do gaam bhi jab vo adaa se vo but aae idhar bhi bhuul kar raah duaa ye maangtaa huun main khudaa se hijaab us kaa huaa shab maane-e-did naqaab ulTi na chehre ki hayaa se ishaara khanjar-e-abru kaa bas thaa mujhe maaraa abas tegh-e-jafaa se bahut bal khaa rahi hai zulf-e-jaanaan bachegi jaan kyuun kar is balaa se hai behtar ik karishme mein hon do kaam madine jaaun raah-e-karbalaa se khudaa jab be-talab bar laae maqsad uThaaun kyuun na haath apne duaa se 'nizaam' ab uqda-e-dil kyuun na hal hon mohabbat hai tujhe mushkil-kushaa se"

"mahv-e-hairat huun miraa khaar ne rasta dekhaa ek kirdaar kaa kirdaar ne rasta dekhaa kaun kahtaa hai talabgaar ne rasta dekhaa ek be-daar kaa bedaar ne rasta dekhaa kam-nasibi ki mulaaqaat se mahrum rahe khush-nasibi ki mire yaar ne rasta dekhaa anginat aae ruke aur ravaana bhi hue kab kisi shakhs kaa sansaar ne rasta dekhaa apne vaalon ne musibat mein bhulaayaa lekin dosti ke liye aghyaar ne rasta dekhaa main ne sachchaai ko jis roz se apnaayaa hai meraa aksar rasan-o-daar ne rasta dekhaa tujh se 'mahmud' use pyaar bahut thaa shaayad marte dam tak tire bimaar ne rasta dekhaa"

"dushmani chalti rahi yaaron ke biich phuul bhi khilte rahe khaaron ke biich ho agar imaan-e-kaamil aaj bhi raqs ho saktaa hai angaaron ke biich dosti ki chhat banaanaa chaahiye ham ko bhi rahnaa hai divaaron ke biich aap ko to chaand kahte the sabhi aap kyon dhundlaa gae taaron ke biich khud-farebi ne sahaaraa de diyaa mil gayaa iqraar inkaaron ke biich khuub hai 'muztar' kaa rang-e-shaairi khuun ki surkhi hai ghazal-paaron ke biich"

"miri jaanib nigaah-e-naaz kar aahista aahista mire dil ke jazire mein utar aahista aahista mohabbat donon jaanib hai tafaavut sirf itnaa hai idhar hai tez-rau lekin udhar aahista aahista tiri beTi kaa qad tere baraabar ho gayaa shaayad tu apni khud-kushi par ghaur kar aahista aahista sahar aai na aae vo sitaaro jaao so jaao ki ab chalte hain ham bhi apne ghar aahista aahista jo kal tak meri barbaadi ki qasmein khaate phirte the vahi ab ho rahe hain dar-ba-dar aahista aahista na jaane rah-ravaan-e-raah kaa ab hashr kyaa hogaa bhaTakte jaa rahe hain raahbar aahista aahista khudaa ke vaaste samjhaa-bujhaa kar rok le koi vo dekho jaa rahe hain ruuTh kar aahista aahista adaavat dil mein rakhnaa muskuraa kar guftugu karnaa sabhi ko aa gayaa hai ye hunar aahista aahista nimaT luun doston ki dosti se pahle ai 'hamza' to lungaa dushmanon ki bhi khabar aahista aahista"

"gila hai apne muqaddar ki be-hisi se hamein aur is se baDh ke shikaayat hai zindagi se hamein kabhi nigaar-e-lab-e-shoala-vash kaa zikr chalaa kabhi hisaar-e-gham-e-jaan milaa kisi se hamein kabhi thaa qurb mein ik iztiraab kaa aalam kabhi qaraar milaa teri be-rukhi se hamein kabhi malaal huaa iltifaat-e-paiham se kabhi khushi thi bahut tark-e-dosti se hamein kabhi gumaan ki ye duniyaa hai ik fareb-e-nazar yaqin bhi hai khudaa ke vajud hi se hamein hayaat-e-jehd-e-musalsal mein kyon hai sargardaan zaraa pataa to chale ilm-o-aagahi se hamein agarche dil ko mili thi naved-e-subh-e-jamaal najaat mil na saki shab ki tirgi se hamein khaDe hain dasht-e-balaa-khez mein barahna-paa milaa hai izn-e-safar jazba-e-khudi se hamein 'sabaa' ye kaun si manzil hai dasht-e-imkaan mein na aashnaa se gharaz hai na ajnabi se hamein"

"ek dariyaa saa musalsal hai ravaan jaante hain ham zamaane se zamaane ko yahaan jaante hain raah-e-haq par hamein rakhnaa hain akele hi qadam saath degaa na hamaaraa ye jahaan jaante hain ham ne jo baat kahi vo bhi na samjhi tum ne dost to dost ki khaamosh zabaan jaante hain laakh aaraaishein mil jaaein magar un ke baghair ghar na ho paaegaa ham se ye makaan jaante hain daa'vaa karte hain khudaa ko bhi samajhne kaa magar ham yahaan Thiik se khud ko bhi kahaan jaante hain jism ke zakhm to sab bhar gae kab ke lekin ruuh par ab bhi jo hain ham vo nishaan jaante hain 'aarzu' kyon ho hamein ‘umr-daraazi ki jab zindagi ham tire sab sud-o-ziyaan jaante hain"

"rakht-e-safar kaa main ne iraada nahin kiyaa raushan charaagh-e-manzil-e-jaada nahin kiyaa tujh se bichhaD ke aur miraa dil udaas ho milne kaa is liye abhi vaada nahin kiyaa shiddat se thaa malaal shab-e-hijr kaa magar shaane pe tere sar ko nihaada nahin kiyaa dil mutmain hai baais-e-tajdid-e-dosti us ko khafaa bhi had se ziyaada nahin kiyaa sab kuchh ataa huaa tiri rahmat se is liye dast-e-talab ko aur kushaada nahin kiyaa shaayad ki meri ruuh ko baalidgi mile khud ko rahin-e-saaghar-o-baada nahin kiyaa shaayad miri jabin ko mile izn-e-bandagi dil ke varq ko is liye saada nahin kiyaa mujh ko na tamkanat kaa ho ehsaas-e-be-ziyaan qaamat ko apne aur sitaara nahin kiyaa apni talaash mein huun 'sabaa' is liye abhi su-e-haram safar kaa iraada nahin kiyaa"