dushmani chalti rahi yaaron ke biich — Muztar Azmi

"qadam milaa ke tujhe kaamyaab main ne kiyaa ki tere khvaab ko taabir-e-khvaab main ne kiyaa zamaana tujh ko bahut pichhe chhoD saktaa thaa ye jaan le ki tujhe ham-rikaab main ne kiyaa andheraa phailaa to maayusiyon ne gher liyaa nayaa ujaalaa magar baazyaab main ne kiyaa miri vafaa ki badaulat mahak uThaa sahraa babul tu ne ugaayaa gulaab main ne kiyaa main jaantaa thaa ki fitrat tiri na badlegi raqaabaton se magar ijtinaab main ne kiyaa gale lagaa le jo dushman ko vo farishta hai yunhi to tujh se nahin ehtisaab main ne kiyaa usi ki baanhon mein TuuTe na saans ai 'muztar' jise masihaa samajh kar khitaab main ne kiyaa"

"tum aag ke dariyaa mein utar kyon nahin jaate sonaa ho to phir tap ke nikhar kyon nahin jaate hai tum ko agar quvvat-e-baazu pe bharosa jis samt mein tufaan hai udhar kyon nahin jaate hain tegh-o-tabar tir-o-sinaan mard ke zevar jab is ki zarurat hai sanvar kyon nahin jaate kyon jaate hain jangal mein darindon ke shikaari basti mein bhi ik roz bikhar kyon nahin jaate manjdhaar mein rokegi jo maujon ki ravaani dariyaa ke kinaare se guzar kyon nahin jaate sahraa mein kaDi dhuup hai jal jaaoge 'muztar' saae mein zaraa der Thahar kyon nahin jaate"

"hamaare dard kaa us ko jo paas ho jaae hamein bhi jiine ki thoDi si aas ho jaae shahid-e-ishq ko ghusl-o-kafan mile na mile magar vo dafn tire ghar ke paas ho jaae tumhaaraa farz hai tum us pe Daal do parda tumhaare saamne jo be-libaas ho jaae mileinge tum ko inhin pattharon mein hiire bhi nigaah shart hai jauhar-shanaas ho jaae main jaantaa huun tiraa aaj-kal jo maqsad hai hamaare zehnon pe taari hiraas ho jaae tumhaari bazm mein maanaa guzaar luun ik din tamaam umr ki lekin na pyaas ho jaae vahaan se apni nazar pher kar guzar 'muztar' jahaan dikhaave kaa tujh ko qayaas ho jaae"

"yaar ke bhes mein mahbub sitamgar niklaa phuul ham jis ko samajhte the vo patthar niklaa ek roTi ke evaz de gayaa jannat ki duaa mere kuche kaa bhikaari bhi mukhayyar niklaa aaj-kal aankh kaa dekhaa bhi ghalat hotaa hai jis ko samjhe the apaahij vo tavangar niklaa vaqt kamzor ko shah-zor banaa detaa hai shaam ko Duubaa magar subh mein khaavar niklaa ghar badalne se bhi taqdir badal jaati hai siip mein paani paDaa ban ke vo gauhar niklaa jo mire zehn-o-takhayyul mein bahut unchaa thaa us kaa qad taalib-e-duniyaa ke baraabar niklaa jis ke zimme thi mire ghar ki hifaazat 'muztar' dushmanon kaa mire vo shakhs bhi ham-sar niklaa"

"saaqi tiraa jamaal bhi meri nazar mein hai main jaantaa huun nuur jo shams-o-qamar mein hai meraa lahu bahaa ke adu mutmain nahin ab meraa khaandaan bhi us ki nazar mein hai akhbaar dekhtaa hai vo hasrat ki aankh se qaari ki zindagi kisi achchhi khabar mein hai yunhi nahin hai shaam se aankhon mein iztiraab khushbu bataa rahi hai koi rahguzar mein hai maanjhi badal badal ke miri fikr thak gai lekin miraa safina abhi tak bhanvar mein hai chhuTkaaraa paa gae hain sabhi is khayaal se insaaniyat kaa dard faqat mere sar mein hai dariyaa ke do kinaare hain milte nahin kabhi 'muztar' azal se bair yahaan khair-o-shar mein hai"

"phuul kaa ruup khizaan mein bhi nikhar saktaa hai ye muqaddar hai kisi vaqt sanvar saktaa hai ishq kaamil ho to haarij nahin hoti maujein bahtaa dariyaa bhi bilaa rok Thahar saktaa hai ye karishma bhi mire rab ne dikhaayaa sab ko zulm kaa dev bilaa maut bhi mar saktaa hai khvaab ki chhaanv mein buzdil hi jiyaa karte hain khvaab to khvaab hai ik pal mein bikhar saktaa hai har andhere mein nikal aataa hai raushan pahlu kufr ki aag mein imaan sanvar saktaa hai tang-dil yaar pe 'muztar' na bharosa karnaa vaqt ke saath ye vaadon se mukar saktaa hai"

"mahv-e-hairat huun miraa khaar ne rasta dekhaa ek kirdaar kaa kirdaar ne rasta dekhaa kaun kahtaa hai talabgaar ne rasta dekhaa ek be-daar kaa bedaar ne rasta dekhaa kam-nasibi ki mulaaqaat se mahrum rahe khush-nasibi ki mire yaar ne rasta dekhaa anginat aae ruke aur ravaana bhi hue kab kisi shakhs kaa sansaar ne rasta dekhaa apne vaalon ne musibat mein bhulaayaa lekin dosti ke liye aghyaar ne rasta dekhaa main ne sachchaai ko jis roz se apnaayaa hai meraa aksar rasan-o-daar ne rasta dekhaa tujh se 'mahmud' use pyaar bahut thaa shaayad marte dam tak tire bimaar ne rasta dekhaa"

"miri jaanib nigaah-e-naaz kar aahista aahista mire dil ke jazire mein utar aahista aahista mohabbat donon jaanib hai tafaavut sirf itnaa hai idhar hai tez-rau lekin udhar aahista aahista tiri beTi kaa qad tere baraabar ho gayaa shaayad tu apni khud-kushi par ghaur kar aahista aahista sahar aai na aae vo sitaaro jaao so jaao ki ab chalte hain ham bhi apne ghar aahista aahista jo kal tak meri barbaadi ki qasmein khaate phirte the vahi ab ho rahe hain dar-ba-dar aahista aahista na jaane rah-ravaan-e-raah kaa ab hashr kyaa hogaa bhaTakte jaa rahe hain raahbar aahista aahista khudaa ke vaaste samjhaa-bujhaa kar rok le koi vo dekho jaa rahe hain ruuTh kar aahista aahista adaavat dil mein rakhnaa muskuraa kar guftugu karnaa sabhi ko aa gayaa hai ye hunar aahista aahista nimaT luun doston ki dosti se pahle ai 'hamza' to lungaa dushmanon ki bhi khabar aahista aahista"

"gila hai apne muqaddar ki be-hisi se hamein aur is se baDh ke shikaayat hai zindagi se hamein kabhi nigaar-e-lab-e-shoala-vash kaa zikr chalaa kabhi hisaar-e-gham-e-jaan milaa kisi se hamein kabhi thaa qurb mein ik iztiraab kaa aalam kabhi qaraar milaa teri be-rukhi se hamein kabhi malaal huaa iltifaat-e-paiham se kabhi khushi thi bahut tark-e-dosti se hamein kabhi gumaan ki ye duniyaa hai ik fareb-e-nazar yaqin bhi hai khudaa ke vajud hi se hamein hayaat-e-jehd-e-musalsal mein kyon hai sargardaan zaraa pataa to chale ilm-o-aagahi se hamein agarche dil ko mili thi naved-e-subh-e-jamaal najaat mil na saki shab ki tirgi se hamein khaDe hain dasht-e-balaa-khez mein barahna-paa milaa hai izn-e-safar jazba-e-khudi se hamein 'sabaa' ye kaun si manzil hai dasht-e-imkaan mein na aashnaa se gharaz hai na ajnabi se hamein"

"ek dariyaa saa musalsal hai ravaan jaante hain ham zamaane se zamaane ko yahaan jaante hain raah-e-haq par hamein rakhnaa hain akele hi qadam saath degaa na hamaaraa ye jahaan jaante hain ham ne jo baat kahi vo bhi na samjhi tum ne dost to dost ki khaamosh zabaan jaante hain laakh aaraaishein mil jaaein magar un ke baghair ghar na ho paaegaa ham se ye makaan jaante hain daa'vaa karte hain khudaa ko bhi samajhne kaa magar ham yahaan Thiik se khud ko bhi kahaan jaante hain jism ke zakhm to sab bhar gae kab ke lekin ruuh par ab bhi jo hain ham vo nishaan jaante hain 'aarzu' kyon ho hamein ‘umr-daraazi ki jab zindagi ham tire sab sud-o-ziyaan jaante hain"

"rakht-e-safar kaa main ne iraada nahin kiyaa raushan charaagh-e-manzil-e-jaada nahin kiyaa tujh se bichhaD ke aur miraa dil udaas ho milne kaa is liye abhi vaada nahin kiyaa shiddat se thaa malaal shab-e-hijr kaa magar shaane pe tere sar ko nihaada nahin kiyaa dil mutmain hai baais-e-tajdid-e-dosti us ko khafaa bhi had se ziyaada nahin kiyaa sab kuchh ataa huaa tiri rahmat se is liye dast-e-talab ko aur kushaada nahin kiyaa shaayad ki meri ruuh ko baalidgi mile khud ko rahin-e-saaghar-o-baada nahin kiyaa shaayad miri jabin ko mile izn-e-bandagi dil ke varq ko is liye saada nahin kiyaa mujh ko na tamkanat kaa ho ehsaas-e-be-ziyaan qaamat ko apne aur sitaara nahin kiyaa apni talaash mein huun 'sabaa' is liye abhi su-e-haram safar kaa iraada nahin kiyaa"

"ek ujli du'aa kaa saaya hai masjid-e-jaan mein kaun aaya hai aane vaale dinon ki soch zaraa ye jo teraa hai sab paraayaa hai zakhm detaa hai sirf apnon ko us ne bhi kyaa mizaaj paayaa hai vaqt ab kyaa mutaalbe hain tire ham ne har qarz to chukaayaa hai haar kar tum se dil mohabbat mein aansuon kaa kharaaj laayaa hai ham andhere parakhne vaalon ne raushni se fareb khaayaa hai dosti pyaar e'tibaar 'anis' 'umr bhar bas ye dhan kamaayaa hai"