tifli piiri o naujavaani hech — Haqeer

"kis ki us tak rasaai hoti hai haan magar jis ki aai hoti hai yaar ham se siyaah-bakhton ki zulf tak kab rasaai hoti hai khuub mil kar gale se ro lenaa is se dil ki safaai hoti hai Dubti hai hamaari kashti-e-dil aap se aashnaai hoti hai shor hai al-firaaq kaa har dam ham se un se judaai hoti hai lashkar-e-gham ki kishvar-e-dil par raat din ab chaDhaai hoti hai un ki mahfil mein jaate Dartaa huun vaan lagaai-bujhaai hoti hai us ke dar par 'haqir' tum bhi chalo vahin mushkil-kushaai hoti hai"

"kaaba-e-dil ko agar Dhaaiyegaa yaad rakhiye ki sazaa paaiyegaa yaad mein meri jo ghabraaiyegaa meri turbat pe chale aaiyegaa thoDi taklif sahi aane mein do ghaDi baiTh ke uTh jaaiyegaa yaad dilvaa ke vo agli baatein bhari mahfil mein na rulvaaiyegaa haal-e-dil kahiye to farmaate hain bakte bakte miraa sar khaaiyegaa yak zaraa aap ko ham dekh to lein baiThiye baiThiye phir jaaiyegaa ye 'haqir' aap se Darne kaa nahin aankhein bas ghair ko dikhlaaiyegaa"

"ai yaas jo tu dil mein aai sab kuchh huaa par kuchh bhi na huaa yaan ho gai khaana-viraani aur teraa zarar kuchh bhi na huaa thaa qasd ki un ko rokeingi shab guzri inhin andeshon mein par haae-re naakaami dil ki hangaam-e-sahar kuchh bhi na huaa ehsaan tiraa mujh par hotaa gar ruuh ko kartaa tan se judaa jab jaan bachi furqat ki shab ai dard-e-jigar kuchh bhi na huaa ai kaash vo baatein ki hotin jo vahshat-e-dil ko kam kartin itnaa jo bakaa to ai naaseh mujh ko to asar kuchh bhi na huaa ab chaahiye aisi fikr tujhe jis se ki nazaare ki Thahre har vaqt ke rone se haasil ai dida-e-tar kuchh bhi na huaa dil aur jigar jaan aur ye sar ham shauq se laae paas tire qismat kaa gila ab kis se karein manzur-e-nazar kuchh bhi na huaa yaa us se javaab-e-khat laanaa yaa qaasid itnaa kah denaa bachne kaa nahin bimaar tiraa irshaad agar kuchh bhi na huaa dhun vasl ki tujh par ghaalib hai tu aish-o-tarab kaa taalib hai kyaa lutf 'haqir' is ulfat kaa betaab agar kuchh bhi na huaa"

"hamaari vo vafaadaari ki tauba aur us ki vo dil-aazaari ki tauba mujhe ab maut behtar zindagi se vo ki tum ne sitamgaari ki tauba tiri zulfon ne sumbul ko chaman mein pakaD kar maar vo maari ki tauba na khud soyaa diyaa un ko na sone vo shab bhar main ne ki zaari ki tauba 'haqir' is dil ke haathon main ne ab ke uThaai aisi bimaari ki tauba"

"jaantaa us ko huun davaa ki tarah chaahtaa us ko huun shifaa ki tarah hai dahan ghaaeb aur kamar anqaa khud bhi naayaab ho humaa ki tarah chaal ne teri fitna-e-mahshar piis Daalaa mujhe hinaa ki tarah khaak chhaani bahut pataa na milaa vo hai naayaab kimiyaa ki tarah is qadar naa-tavaan 'haqir' hain ham hil nahin sakte naqsh-e-paa ki tarah"

"bahaar aai hai sadme se hamaaraa haal abtar hai ghaTaa ghanghor chhaai hai na saaqi hai na saaghar hai nishaan kyaa puchhte hain aap ham khaana-ba-doshon kaa kabhi gulshan mein maskan hai kabhi sahraa mein bistar hai haqaarat ki nigaahon se na farsh-e-khaak ko dekho amiron kaa faqiron kaa yahi aakhir ko bistar hai 'haqir' ik khvaab thaa jo aap ne dekhaa thaa london mein na vo saamaan hai baaqi na ab pahlu mein dilbar hai"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"gali gali hain bheDiye muhaafizon ke ruup mein kasaafaton kaa raaj hai nafaasaton ke ruup mein ham ahl-e-shauq zakhm chaaTte ravaan-davaan rahe saDak pe khaar the saje hue gulon ke ruup mein huzur vaqt mil sake to ek baar dekh lein ye saailon ke masale hain faailon ke ruup mein kahaa gayaa thaa manzil-e-muraad paaeinge magar hamein jo raahzan mile hain rahbaron ke ruup mein ab apne khuun par bhi e'timaad kuchh muhaal hai safediyaan chhipi hui hain surkhiyon ke ruup mein baDe qalam-farosh log the jinhon ne aakhirash hamein tabaah kar diyaa hai 'aalamon ke ruup mein abhi se kyon gumaan-e-tark-e-'aashiqi huaa tumhein abhi to naachtaa hai khuun dhaDkanon ke ruup mein"