Ghazal

"pahle to ik charaagh jalaayaa hai der tak phir baad mein havaa se bachaayaa hai der tak mujh pe nazar thi mere raqibon ki is liye main ne bhi khuub rang jamaayaa hai der tak jis ne ye kah diyaa main kisi kaam kaa nahin ehsaas us ko apnaa karaayaa hai der tak guzraa nahin thaa shakhs jo mere qarib se us ne bulaa ke paas biThaayaa hai der tak kar luun yaqin us pe magar masala hai ye be-vajah us ne haath milaayaa hai der tak paani se dho liye the sabhi daagh jism ke daaman kaa daagh us ne chhuDaayaa hai der tak kuchh to lahu kaa rang bhi halkaa nikal gayaa kuchh vaqt ne bhi khel dikhaayaa hai der tak"

"apne paraae sab se nibhaataa hai kis tarah logon ke saath pesh tu aataa hai kis tarah gahri kisi bhi niind se achchhaa hai jaagnaa soyaa huaa zamir jagaataa hai kis tarah ham vaqt ko parakhne se pahle ye dekh lein ye vaqt ham ko paaTh paDhaataa hai kis tarah be-shak tu kar savaal tiri zindagi hai par tu zindagi kaa saath nibhaataa hai kis tarah us ko gale lagaane se pahle ye dekhnaa vo shakhs tum se haath milaataa hai kis tarah"

"duniyaa ne yahi mujh ko har baar bataayaa hai koi bhi nahin apnaa har shakhs paraayaa hai ye vaqt mujhe aksar letaa hai nishaane par main ne bhi ise apnaa andaaz dikhaayaa hai aandhi ne giraae hain kuchh peD baDe lekin mushkil mein khaDe rahnaa ye paaTh paDhaayaa hai ik raah judaa hoti ik raah nazar aati manzil kaa pata us ne kuchh yuun bhi bataayaa hai karnaa hai baDaa khud ko to soch baDi rakhnaa gamle mein bhalaa kis ne bargad ko ugaayaa hai jo aankh ki had mein thaa dekhaa hai vahi pahle phir dil ki nigaahon ne kuchh aur dikhaayaa hai"

"tayyaar huun jis shakhs par saansein luTaane ke liye vo chal rahaa hai chaal mujh ko aazmaane ke liye rishte banaane se kabhi chalte nahin hain umr-bhar aadaab aane chaahiyein rishta nibhaane ke liye main vo nahin jis ko mili hai raushni khairaat mein mujh ko bahut jalnaa paDaa hai jagmagaane ke liye aasaan hai sar ko jhukaa denaa kisi darbaar mein lekin kaleja chaahiye sar ko uThaane ke liye kuchh tai nahin hai zindagi mein vaqt rone kaa magar maaqul hai har ek lamha muskuraane ke liye"

"khushiyon ne intizaar karaayaa hai umr-bhar ujDaa huaa dayaar sajaayaa hai umr-bhar chhoTe se kaam mein bhi bahut kharch main huaa mujh ko yuun zindagi ne sataayaa hai umr-bhar har vaqt jo charaagh havaa ki nazar mein thaa ham ne vahi charaagh jalaayaa hai umr-bhar apnaa rahaa nahin hai mukammal koi pata khvaabon kaa ek shahr basaayaa hai umr-bhar mujh ko agar zaraa saa diyaa hai to baad mein ehsaan zindagi ne jataayaa hai umr-bhar do chaar sher kah bhi sakaa vo bhi is liye ham ne ghazal pe ishq luTaayaa hai umr-bhar"

"zehn ke charaaghon ko muddaton jalaayaa hai tab kahin hunar mujh mein sochne kaa aaya hai aap ye samajhte hain yunhi mil gai mujh ko is zamin ki khaatir aasmaan uThaayaa hai jis jagah samundar mein kashtiyon ne dam toDaa aankh ne vahi manzar der tak dikhaayaa hai daagh lagne kaa khatra jab bhi baDh gayaa main ne jism ko kinaare rakh ruuh ko bachaayaa hai us ke baad aankhon ne aur kuchh nahin dekhaa ek khvaab ne mujh ko umr-bhar jagaayaa hai vaqt hi nahin deti sochne samajhne kaa zindagi ne ujlat mein raasta dikhaayaa hai manzilon ki baatein bhi ek din kareinge ham raah mein abhi ham ne ik qadam baDhaayaa hai"

"fursat mile kabhi to garebaan mein jhaankiye khud ko tu dekh le vo hunar bhi taraashiye achchhe-bure kaa farq samajhnaa bhi siikh le duniyaa ko ik nazar se hamesha na dekhiye suraj ugaa to dhuup tire paas aa gai ab dhuup ko banaane kaa daavaa na kijiye duniyaa mein aur log bhi behtar hain aap se duniyaa ko dekh aur ye sach maan lijiye jo kuchh milaa tujhe vo khudaa ne ataa kiyaa naadaan apne aap ko sab kuchh na maaniye dil ko sukun jahaan bhi mile us taraf chalein jaanaa na ho jidhar to udhar rukh na kijiye"

"dabi ho baat jo dil mein use baahar nikaalaa kar nigaahon mein basaa kar ke hasin ik khvaab paalaa kar udaasi kyon rahe man mein udaasi to rulaati hai zaruri hai udaasi pe khushi kaa rang Daalaa kar buraa ho vaqt tab khud ko bikharne se bachaanaa hai magar ye shart hai koshish kisi saanche mein Dhaalaa kar iraada hai badalne kaa to koshish kar badalne ki agar suraj nahin hai to charaaghon se ujaalaa kar milegi haar yaa phir jiit kaa parcham uThaaegaa natija jo rahe lekin nayaa sikka uchhaalaa kar"

"main ek saada lafz thaa mansub us se kyaa huaa us ne navaazaa is tarah main ho gayaa huun qaafiya duniyaa hiqaarat se jise be-faiz kahti thi vahi har-su ujaalaa kar rahaa hai raat se laD kar diyaa pahle nazar ke raaste dil mein rahaa hai kuchh dinon vo ab ragon mein aa gayaa hai ishq us se yuun kiyaa kyaa bitti hai dil pe us ko ye khabar hai hi nahin kaise bataaun main use nindein uDiin paagal huaa masrufiyat donon ki aisi mil nahin paate magar vo har tarah se paas hai ik jism hi to hai judaa ik din khudaa se maang li ham ne zaraa si raushni us ki inaayat ye hui suraj uThaa kar de diyaa kyaa kyaa nazaare dekhti hai aankh meri raat-din aasaan nahin thaa jo kabhi par ishq mein vo bhi huaa"

"zindagi ki hai zarurat peT bharnaa chaahiye peT bharne ke liye kuchh kaam karnaa chaahiye sirf khvaabon kaa hasin honaa yahaan kaafi nahin khvaab puuraa karne ko had se guzarnaa chaahiye 'ishq mein dil Tuut jaae ye to mumkin hai magar kyaa zaruri Tuut kar sab ko bikharnaa chaahiye jo 'ataa ki hai khudaa ne zindagi utni rahe kyuun kisi ko bhi yahaan be-maut marnaa chaahiye ab sazaa ki baat sun ke Dar rahe hain aap kyuun aap ko zulm-o-sitam ke vaqt Darnaa chaahiye iltijaa karte hue pyaasaa parinda mar gayaa ab to dariyaa ko hayaa se Duub marnaa chaahiye"

"tujh ko hai mujh se pyaar kabhi e'tiraaf kar yaa kaun hai pasand ye tasvir saaf kar mere qarib aa ke gale lag jaa meri jaan kuchh aur tere man mein hai to inhiraaf kar kyuun ik zaraa si baat pe naaraaz mujh se hai main ne khataa qubul ki tu ab muaaf kar tere ghamon ko raat kaa bistar banaa luun main meri khushi ko le ke inhein tu lihaaf kar chalnaa hai zindagi ke safar mein to saath chal chalnaa hai kitni duur talak inkishaaf kar ummid har kisi se lagaanaa fuzul hai tu jis ko chaahtaa hai usi kaa tavaaf kar"