Ghazal

"adaa-shanaas tiraa be-zabaan nahin hotaa kahe vo kis se koi nukta-daan nahin hotaa sab ek rang mein hain mai-kade ke khurd o kalaan yahaan tafaavut-e-pir-o-javaan nahin hotaa qimaar-e-ishq mein sab kuchh ganvaa diyaa main ne umid-e-nafaa mein khauf-e-ziyaan nahin hotaa sahm rahaa huun main ai ahl-e-qabr batlaa do zamin tale to koi aasmaan nahin hotaa vo mohtasib ho ki vaaiz vo falsafi ho ki shaikh kisi se band tiraa raaz-daan nahin hotaa vo sab ke saamne is saadgi se baiThe hain ki dil churaane kaa un par gumaan nahin hotaa jo aap chaahein ki le lein kisi kaa muft mein dil to ye muaamlaa yuun mehrbaan nahin hotaa jahaan fareb ho 'majzub' ye tiri surat buton ke ishq kaa tujh par gumaan nahin hotaa"

"dil-rubaa pahlu se ab uTh kar judaa hone ko hai kyaa ghazab hai kyaa qayaamat hai ye kyaa hone ko hai dushmani-e-khalq meri rahnumaa hone ko hai ab miraa dast-e-talab dast-e-duaa hone ko hai tu ne chaahaa thaa buraa meraa bhalaa hone ko hai aab-e-khanjar halq mein aab-e-baqaa hone ko hai aaj to ji bhar ke pi lene de ai saaqi mujhe jaan hi jaati rahegi aur kyaa hone ko hai ai dil-e-pur-aarzu kar de sar-e-taslim kham dekh kin haathon se khun-e-muddaaa hone ko hai shokh-raftaari kaa apni dekh to muD kar asar saath saath uTh kar ravaan har naqsh-e-paa hone ko hai"

"nazaare hue hain ishaare hue hain ham un ke hue vo hamaare hue hain hamein to bhale lagte hain aur bhi ab vo zevar ko apne utaare hue hain nahin paas kuchh ek dil hai so vo bhi qimaar-e-mohabbat mein haare hue hain maze vasl mein jo uThaae the ai dil judaai mein ab vo hi aare hue hain hamein hosh hai ab kahaan tan-badan kaa ki 'majzub' un ke pukaare hue hain"

"vo mast-e-naaz aataa hai zaraa hoshyaar ho jaanaa yahin dekhaa gayaa hai be-piye sarshaar ho jaanaa hamaaraa shaghl hai raaton ko ronaa yaad-dilbar mein hamaari niind hai mahv-e-khayaal-e-yaar ho jaanaa lagaavaT se tiri kyaa dil khule maalum hai ham ko zaraa si baat mein khinch kar tiraa talvaar ho jaanaa abas hai justuju bahr-e-mohabbat ke kinaare ki bas is mein Duub marnaa hi hai ai dil paar ho jaanaa nahin darkaar mai ham ko piye jaa tu hi ai saaqi hamein to mast kartaa hai tiraa sarshaar ho jaanaa"

"pas-e-parda tujhe har bazm mein shaamil samajhte hain koi mahfil ho ham us ko tiri mahfil samajhte hain baDe hoshiyaar hain vo jin ko sab ghaafil samajhte hain nazar pahchaante hain vo mizaaj-e-dil samajhte hain vo khud kaamil hain mujh naaqis ko jo kaamil samajhte hain vo husn-e-zan se apnaa hi saa meraa dil samajhte hain samajhtaa hai gunah rindi ko tu ai zaahid-e-khud-bin aur aise zohd ko ham kufr mein daakhil samajhte hain samajhtaa hai ghalat lailaa ko lailaa qais divaana nazar vaale to lailaa ko bhi ik mahmil samajhte hain saDi divaana saudaai jo chaahe so kahe duniyaa haqiqat-bin magar 'majzub' ko aaqil samajhte hain"

"na dekhungaa hasinon ko are tauba na dekhungaa taqaazaa laakh tu kar ai dil-e-shaidaa na dekhungaa karun naaseh main kyunkar haae ye vaada na dekhungaa nazar paD jaaegi khud hi jo daanista na dekhungaa nigaah-e-naaz ko teri main sharminda na dekhungaa haTaae letaa huun apni nazar achchhaa na dekhungaa vo kahte hain na samjhungaa tujhe 'majzub' main aashiq ki jab tak kucha o baazaar mein rusvaa na dekhungaa balaa se main agar ro ro ke binaai bhi kho baiThun karungaa kyaa in aankhon ko jo vo jalva na dekhungaa balaa se mere dil par meri jaan kuchh hi guzar jaae main teri khaatir-e-naazuk ko aazurda na dekhungaa uThaaungaa na zaanu se main hargiz apnaa sar hamdam are main apni aankhon se unhein jaataa na dekhungaa hasinon se vahi phir hazrat-e-dil dida-baazi hai abhi to kar rahe the aap ye daavaa na dekhungaa zaraa ai naaseh-e-farzaanaa chal kar sun to do baatein na hogaa phir bhi tu 'majzub' kaa divaana dekhungaa"

"har chiiz mein aks-e-rukh-e-zebaa nazar aayaa aalam mujhe sab jalva hi jalva nazar aayaa tu kab kisi taalib ko saraapaa nazar aayaa dekhaa tujhe utnaa jise jitnaa nazar aayaa kiin band jab aankhein to miri khul gaiin aankhein kyaa tum se kahun phir mujhe kyaa kyaa nazar aayaa jab mahr numaayaan huaa sab chhup gae taare tu mujh ko bhari bazm mein tanhaa nazar aayaa gardun ko bhi ab dekh ke hoti hai tasalli ghurbat mein yahi ek shanaasaa nazar aayaa sab daulat-e-kaunain jo di ishq ke badle is bhaao ye saudaa mujhe sastaa nazar aayaa naakaam hi taa-umr rahaa taalib-e-didaar har jalva tiraa baad ko pardaa nazar aayaa jo duur nigaahon se sar-e-arsh-e-barin hai vo nuur sar-e-gumbad-e-khazraa nazar aayaa majzub' kabhi soz kabhi saaz hai tujh mein tu 'mir' kabhi aur kabhi 'saudaa' nazar aayaa majzub' ke jazbe ki jo samjhe na haqiqat un aql ke andhon ko ye saudaa nazar aayaa"

"har tamannaa dil se rukhsat ho gai ab to aa jaa ab to khalvat ho gai vo riyaa jis par the zaahid taana-zan pahle aadat phir ibaadat ho gai ji rahaa huun maut ki ummid mein mar hi jaaungaa jo sehhat ho gai laakh jhiDko ab nahin phirtaa hai dil ho gai ab to mohabbat ho gai mana'-e-shai vaaiz hai vajh-e-hirs-e-shai ab to mai se aur raghbat ho gai yaa to masjid raat-din yaa mai-kada kyaa se kyaa allaah haalat ho gai kar chuke rindi bas ab 'majzub' tum ek chullu mein ye haalat ho gai"

"vafaa kar ke us kaa silaa chaahtaa huun baDaa naa-sazaa huun sazaa chaahtaa huun buton ko baraae khudaa chaahtaa huun sar-e-kham dil-e-mubtalaa chaahtaa huun rahaa umr bhar chup main yuun un ke aage ki jaise kuchh un se kahaa chaahtaa huun sataae bhi koi to paae duaaein gadaa huun main sab kaa bhalaa chaahtaa huun bhulaataa huun phir bhi vo yaad aa rahe hain vahi chaahte hain main kyaa chaahtaa huun"